കോട്ടയം: ജന്മസാഫല്യം നേടി ഭാഗവതഹംസം മള്ളിയൂര് ശങ്കരന് നമ്പൂതിരി (91) ഓര്മ്മയായി. മാസങ്ങളായി മള്ളിയൂര് മനയിലും ക്ഷേത്രത്തിലുമായി ഈശ്വരസേവയുമായി വിശ്രമ ജീവിതത്തിലായിരുന്നു. പ്രായാധിക്യം മൂലമുള്ള രോഗങ്ങളും അലട്ടിയിരുന്നു. ഇന്നലെ രാവിലെ ആറേമുക്കാലോടെ മള്ളിയൂരിലെ വസതിയിലായിരുന്നു അന്ത്യം സംഭവിച്ചത്.
പൂര്ണ ഔദ്യോഗിക ബഹുമതികളോടെയായിരുന്നു സംസ്കാരം. മള്ളിയൂരിലെ തറവാടുവീടിന്റെ തെക്കേപ്പറമ്പില്, ഭാഗവതസപ്താഹം നടക്കുന്ന സദസ്സിന്റെ മുന്വശത്തായൊരുക്കിയ ചിതയില് രാത്രി എട്ടരയോടെയാണു ഭൗതിക ശരീരം അഗ്നിനാളങ്ങള് ഏറ്റുവാങ്ങിയത്. മകന് പരമേശ്വരന് നമ്പൂതിരി ചിതയ്ക്കു തീകൊളുത്തി. ഭാര്യ മേഴത്തൂര് അരപ്പാനാട്ടു മനയില് (കാട്ടില് മന) പരേതയായ സുഭദ്ര അന്തര്ജനം. മക്കള്: പരമേശ്വരന് നമ്പൂതിരി, ദിവാകരന് നമ്പൂതിരി, ആര്യ അന്തര്ജനം, അംബികാദേവി. മരുമക്കള്: ദാമോദരന് നമ്പൂതിരി (കാവുങ്കല്, മംഗലശ്ശേരി), മോഹനന് നമ്പൂതിരി (വാഴുവേലില്, പന്തളം), സതീദേവി.
ഏഴു പതിറ്റാണ്ടിലേറെ ശ്രീകൃഷ്ണ കഥാഖ്യാനവുമായി രാജ്യമെങ്ങും രണ്ടായിരത്തിയഞ്ഞൂറിലധികം ഭാഗവത സപ്താഹങ്ങള് നടത്തിയ മള്ളിയൂരിനു ഗുരുവായൂര് ഭാഗവത വിജ്ഞാന സമിതിയാണു ‘ഭാഗവതഹംസം ബഹുമതി നല്കിയത്.
കോട്ടയം കുറുപ്പന്തറയ്ക്കു സമീപം മാഞ്ഞൂര് പഞ്ചായത്തിലെ മള്ളിയൂര് മനയില് പരമേശ്വരന് നമ്പൂതിരിയുടെയും ആര്യ അന്തര്ജനത്തിന്റെയും മകനായി കൊല്ലവര്ഷം 1096 മകരമാസത്തിലെ മൂലം നക്ഷത്രത്തിലായിരുന്നു (1921 ഫെബ്രുവരി രണ്ട്) ശങ്കരന്റെ ജനനം. ദാരിദ്ര്യവും അനാരോഗ്യവും വേട്ടയാടിയ ബാല്യകൗമാരങ്ങളില് ഔപചാരിക വിദ്യാഭ്യാസത്തിന് അവസരം കിട്ടിയില്ല. പലപ്പോഴായി പല ഗുരുക്കന്മാരില് നിന്നാണു കുഞ്ഞുണ്ണി എന്ന ശങ്കരന് നമ്പൂതിരി സംസ്കൃതവും വേദശാസ്ത്രങ്ങളും അഭ്യസിച്ചത്.
അനാരോഗ്യം ചെറുപ്പത്തിലേ വേട്ടയാടാന് തുടങ്ങിയതോടെ അമ്മയുടെ നിര്ദേശാനുസരണം ഗുരുവായൂരില് ഭജനമിരിക്കാന് പുറപ്പെട്ടതാണു ജീവിതത്തില് വഴിത്തിരിവായത്. മഹാപണ്ഡിതനായ പടപ്പ നീലകണ്ഠന് നമ്പൂതിരിയില് നിന്നു ഭാഗവതം അറിയാനുള്ള അവസരമായി ഇത്. കുടുംബത്തിലെ ഇഷ്ടദേവനായ ഗണപതിക്കു മുന്നില് സപ്താഹം ആരംഭിച്ച ശങ്കരന് നമ്പൂതിരി വൃന്ദാവനം, ഗുരുവായൂര്, അമ്പലപ്പുഴ, സൂര്യകാലടി, ഒളശ്ശ, കുമാരനല്ലൂര് എന്നിങ്ങനെ അസംഖ്യം വേദികളിലേക്കുള്ള യാത്ര തുടങ്ങുകയായിരുന്നു.
ശ്രീകൃഷ്ണനും ഗണപതിയും സംഗമിച്ച് അപൂര്വമായ വൈഷ്ണവ ഗണപതി സങ്കല്പമാണു മള്ളിയൂര് ക്ഷേത്രത്തിലേത്. ഗുരുവായൂര് ദേവസ്വത്തിന്റെ ജ്ഞാനപ്പാന പുരസ്കാരവും മള്ളിയൂരിനെ തേടിയെത്തി. രാമകഥാമാധുരി എന്ന ലേഖന സമാഹാരവും പുഷ്പാഞ്ജലി എന്ന കാവ്യസമാഹാരവും അദ്ദേഹത്തിന്റേതായിട്ടുണ്ട്.
മുഖ്യമന്ത്രി ഉമ്മന് ചാണ്ടിയും മന്ത്രിമാരും രാഷ്ട്രീയ – സാംസ്കാരിക – ആധ്യാത്മിക രംഗത്തെ പ്രമുഖരുമടക്കം ആയിരക്കണക്കിനു പേര് മള്ളിയൂരിലെത്തി ആദരാഞ്ജലി അര്പ്പിച്ചു.
Discussion about this post