തിരുവനന്തപുരം: ഗവര്ണര് ആരിഫ് മുഹമ്മദ് ഖാനെ വിമര്ശിച്ച് സിപിഐ സംസ്ഥാന സെക്രട്ടറി കാനം രാജേന്ദ്രന്. ചാന്സലര് പദവിയില്നിന്ന് മാറ്റാനുള്ള സാഹചര്യം ഗവര്ണറായിട്ട് ഉണ്ടാക്കരുതായിരുന്നു. രഹസ്യമാക്കി വെക്കേണ്ട കത്തിടപാടുകള് പരസ്യമാക്കി മാന്യത ലംഘിച്ചത് ഗവര്ണറാണെന്നും കാനം മാധ്യമങ്ങളോട് പറഞ്ഞു.
ചാന്സലര് പദവിയില് നിന്ന് ഗവര്ണറെ മാറ്റാന് എല്ഡിഎഫ് ആഗ്രഹിച്ചിട്ടില്ല. കേരള നിയമസഭ പാസാക്കിയ നിയമത്തിന്റെ അടിസ്ഥാനത്തിലാണ് ഗവര്ണറെ ചാന്സലറാക്കുന്നതെന്നും അതു വേണ്ടെന്നു വയ്ക്കാനുള്ള സ്വാതന്ത്ര്യം സഭയ്ക്ക് ഇപ്പോഴും ഉണ്ട്. അതിനു സര്ക്കാരിനെ നിര്ബന്ധിക്കരുതെന്നും കാനം കൂട്ടിച്ചേര്ത്തു.
നേരത്തേ, ഗവര്ണര്ക്ക് മറുപടിയുമായി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനും രംഗത്തെത്തിയിരുന്നു. ഗവര്ണറുടെ നിലപാട് ദുരൂഹമാണെന്നും എന്നാല് ഏറ്റുമുട്ടല് ആഗ്രഹിക്കുന്നില്ലെന്നും കോടിയേരി മാധ്യമങ്ങളോട് പറഞ്ഞു.
സമ്മര്ദത്തിന് വഴങ്ങി ഉത്തവുകളില് ഒപ്പിടേണ്ട ആളല്ല ചാന്സലര്. ചാന്സലര് പദവിയിലിരിക്കുന്ന ആള്ക്ക് വിവേചനാധികാരമുണ്ട്. കാലടിയില് ഒരു പേര് മതിയെന്ന് പറഞ്ഞത് ഗവര്ണറാണ്. ഇപ്പോള് മാറ്റിപ്പറയുന്ന ഗവര്ണറുടെ നീക്കം ദുരൂഹമാണ്. സര്ക്കാരും ഗവര്ണറും തമ്മിലുള്ള പ്രശ്നം അവര് തന്നെ തീര്ക്കണമെന്നും കോടിയേരി ആവശ്യപ്പെട്ടു.
Discussion about this post