കൊച്ചി: എസ്എന്‍ഡിപി യോഗത്തില്‍ നിലനില്‍ക്കുന്ന തെരഞ്ഞെടുപ്പു രീതി ഹൈക്കോടതി റദ്ദാക്കി. പ്രാതിനിധ്യ വോട്ടവകാശരീതിയാണ് റദ്ദാക്കിയത്. തെരഞ്ഞെടുപ്പുമായി ബന്ധപ്പെട്ടു ഹൈക്കോടതി പുറപ്പെടുവിച്ച വിധി ദൂരവ്യാപക ഫലം ഉളവാക്കുന്നതാണ്. അതുപോലെ 1999ലെ ബൈലോ ഭേദഗതിയും കോടതി റദ്ദാക്കി.
ഇതോടെ എസ്എന്‍ഡിപി സ്ഥിരം അംഗങ്ങളായ മുഴുവന്‍ പേര്‍ക്കും വോട്ടവകാശം ലഭിക്കുന്ന സ്ഥിതിയാണ് നടപ്പിലാകാന്‍ പോകുന്നത്. ഇത്രയും നാള്‍ പ്രാതിനിധ്യ പ്രകാരമുള്ള വോട്ടാണ് നടന്നിരുന്നത്. 200 അംഗങ്ങള്‍ക്ക് ഒരു പ്രതിനിധി എന്ന നിലയിലായിരുന്നു വോട്ടവകാശം.
കാല്‍ നൂറ്റാണ്ടായി എസ്എന്‍ഡിപി ഭാരവാഹിത്വത്തില്‍ തുടരുന്ന വെള്ളാപ്പള്ളി നടേശന്റെ എതിര്‍ചേരിയിലുള്ളവര്‍ നടത്തിയ നിയമപോരാട്ടമാണ് ഇപ്പോള്‍ എസ്എന്‍ഡിപിയുടെ തെരഞ്ഞെടുപ്പ് പ്രക്രിയ അടിമുടി മാറ്റുന്ന തരത്തിലുള്ള വിധിയിലേക്കു കാര്യങ്ങള്‍ എത്തിച്ചിരുന്നത്. കന്പനി നിയമത്തില്‍ 1974ല്‍ കേന്ദ്രസര്‍ക്കാരിന്റെ പ്രത്യേക ഇളവ് നേടിയാണ് പ്രാതിനിധ്യ വോട്ടവകാശ രീതി എന്‍എന്‍ഡിപി തുടര്‍ന്നു വന്നിരുന്നത്. കോടതി വിധിയോടെ ഈ ഇളവും റദ്ദാക്കപ്പെട്ടു.
വിധി പഠിച്ചശേഷം പ്രതികരിക്കാമെന്നാണ് വെള്ളാപ്പള്ളി നടേശന് മാധ്യമങ്ങളോടു പറഞ്ഞത്. കഴിഞ്ഞ 25 വര്‍ഷമായി താന്‍ എസ്എന്‍ഡിപിയുടെ ജനറല്‍ സെക്രട്ടറിയായി തെരഞ്ഞെടുക്കപ്പെട്ടെത്തു പ്രാതിനിധ്യ വോട്ടവകാശ സംവിധാനത്തിലൂടെയാണെന്നും അതിനു മാറ്റം വരുത്തിയ ഹൈക്കോടതി വിധി പരിശോധിച്ചശേഷമേ പ്രതികരിക്കാന്‍ കഴിയൂ എന്നും അദ്ദേഹം പറഞ്ഞു. അതേസമയം, വെള്ളാപ്പള്ളിയുടെ എതിര്‍ ചേരിയിലുള്ള അഡ്വ.സി.കെ. വിദ്യാസാഗര്‍, ചന്ദ്രസേനന്‍, ബിജു രമേശ് തുടങ്ങിയവര്‍ ഹൈക്കോടതി വിധിയെ സ്വാഗതം ചെയ്തു.
വിധിയെ സ്വാഗതം ചെയ്‌തെങ്കിലും തെരഞ്ഞെടുപ്പു പ്രക്രിയ അതി സങ്കീര്‍ണമായി മാറുന്ന സ്ഥിതിയാണ് വരുന്നതെന്ന ഉത്കണ്ഠ വിദ്യാസാഗര്‍ പങ്കുവച്ചു. ലക്ഷക്കണക്കിനു പേര്‍ക്കു വോട്ടവകാശം കിട്ടുന്നതോടെ ഒരു പൊതു തെരഞ്ഞെടുപ്പിനു സമാനമായ ഒരുക്കങ്ങള്‍ എസ്എന്‍ഡിപി തെരഞ്ഞെടുപ്പു പ്രക്രിയയ്ക്കായി ഒരുക്കേണ്ടി വരുമെന്നതാണ് ഏറ്റവും വലിയ വെല്ലുവിളി.
തെരഞ്ഞെടുപ്പു പട്ടികയും മറ്റു ക്രമീകരണങ്ങളും ഒരുക്കുന്നതു വന്‍ ചെലവുള്ളതും സങ്കീര്‍ണവും ദുഷ്‌കരവുമായ കാര്യമായിരിക്കുമെന്നു ചൂണ്ടിക്കാണിക്കപ്പെടുന്നു. എന്നാല്‍, വെള്ളാപ്പള്ളിയുടെ നേതൃത്വത്തില്‍ കൈയടിക്കിവച്ചു നടത്തിക്കൊണ്ടിരിക്കുന്ന ജനാധിപത്യ വിരുദ്ധഭരണമാണ് ഇങ്ങനെയൊരു വിധിയിലേക്കു പോകാനുള്ള സാഹചര്യമുണ്ടാക്കിയതെന്നു വിദ്യാസാഗര്‍ ആരോപിച്ചു. ഇതു വെള്ളാപ്പള്ളി നടേശന് എതിരായ വിധിയെഴുത്താണെന്നു ബിജു രമേശ് പ്രതികരിച്ചു. അടുത്ത മാസം എസ്എന്‍ഡിപി തെരഞ്ഞെടുപ്പ് നടക്കാനിരിക്കെയാണ് പുതിയ വിധി.
ഇനി എസ്എന്‍ഡിപിയിലെ ഭരണകാലാവധി അഞ്ചു വര്‍ഷത്തിനു പകരം മൂന്നു വര്‍ഷമായി മാറുമെന്നും ചൂണ്ടിക്കാണിക്കപ്പെടുന്നു. അതേസമയം, വിധിക്കെതിരേ വെള്ളാപ്പള്ളി വിഭാഗം അപ്പീല്‍ പോകാനാണ് സാധ്യത. എസ്എന്‍ഡിപി തെരഞ്ഞെടുപ്പുമായി ബന്ധപ്പെട്ട നിയമപോരാട്ടം തുടരും എന്നു തന്നെയാണ് ഇതു നല്‍കുന്ന സൂചന.
Discussion about this post