കോട്ടയം: സിനിമ-സീരിയല് നടന് കോട്ടയം പ്രദീപ് (61) അന്തരിച്ചു. ഹൃദയാഘാതം മൂലം വ്യാഴാഴ്ച പുലര്ച്ചെ 4.15-ഓടെ കോട്ടയത്തെ സ്വകാര്യ ആശുപത്രിയിലായിരുന്നു അന്ത്യം.
1999 ല് ഐ.വി. ശശി സംവിധാനം ചെയ്ത ‘ഇ നാട് ഇന്നലെ വരെ’ എന്ന ചിത്രത്തിലൂടെയാണ് ജൂനിയര് ആര്ട്ടിസ്റ്റായി കരിയര് ആരംഭിച്ച പ്രദീപ് അഭിനയ രംഗത്തെത്തുന്നത്. വിണ്ണൈത്താണ്ടി വരുവായാ, തട്ടത്തിന് മറയത്ത്, ആട്, വടക്കന് സെല്ഫി, കട്ടപ്പനയിലെ ഋത്വിക് റോഷന്, തോപ്പില് ജോപ്പന്, കുഞ്ഞിരാമായണം തുടങ്ങി 70-ലേറെ ചിത്രങ്ങളില് അഭിനയിച്ചു.
കോട്ടയം കുമാരനല്ലൂര് സ്വദേശിയാണ് പ്രദീപ്. കാരാപ്പുഴ സര്ക്കാര് സ്കൂളിലും ബസേലിയസ് കോളജിലും കോപ്പറേറ്റീവ് കോളജിലുമായി പഠനം പൂര്ത്തിയാക്കി. 1989 മുതല് എല്ഐസി ഉദ്യോഗസ്ഥനായി. പത്താം വയസില് എന്.എന്. പിള്ളയുടെ ‘ഈശ്വരന് അറസ്റ്റില്’ എന്ന നാടകത്തില് ബാലതാരമായി അഭിനയിച്ച് തുടങ്ങിയ കോട്ടയം പ്രദീപ് 40 വര്ഷമായി നാടകരംഗത്തും സജീവമാണ്.
Discussion about this post