തിരുവനന്തപുരം: യുക്രെയ്നില് കുടുങ്ങിയ മലയാളി വിദ്യാര്ത്ഥികളെ നാട്ടിലെത്തിക്കാനുള്ള ശ്രമങ്ങള് തുടരുകയാണെന്നും എല്ലാവരും യാത്രയില് ആവശ്യമായ മുന്കരുതലുകള് സ്വീകരിക്കണമെന്നും മുഖ്യമന്ത്രി പിണറായി വിജയന്. കീവില് കര്ഫ്യു ഒഴിവാക്കിയിട്ടുണ്ട്. നാട്ടിലേക്ക് വരാന് തയ്യാറെടുത്തിരിക്കുന്നവര്ക്ക് റെയില്വേ സൗകര്യം ഒരുക്കിയിട്ടുണ്ട്. യുക്രെയ്ന് റെയില്വേ നടത്തുന്ന പ്രത്യേക ട്രെയിന് സര്വീസുകളുടെ പ്രയോജനം എല്ലാ മലയാളി വിദ്യാര്ത്ഥികളും പരമാവധി പ്രയോജനപ്പെടുത്തണമെന്നും മുഖ്യമന്ത്രിയുടെ ഫേസ്ബുക്ക് കുറിപ്പില് പറയുന്നു.
കീവില് കുടുങ്ങി കിടക്കുന്ന ഇന്ത്യന് വിദ്യാര്ത്ഥികള് പടിഞ്ഞാറന് ഭാഗങ്ങളിലേക്ക് നീങ്ങണമെന്ന് ഇന്ത്യന് എംബസിയും അറിയിച്ചിട്ടുണ്ട്. നഗരത്തിലെ വാരാന്ത്യ കര്ഫ്യു അവസാനിച്ചതിനെ തുടര്ന്ന് കീവില് നിരവധി പ്രദേശങ്ങളില് കെട്ടിടങ്ങള്ക്ക് നേരെ ആക്രമണവും തെരുവില് സംഘര്ഷ സ്ഥിതിയും ഉടലെടുത്തിരുന്നു. ഈ പശ്ചാത്തലത്തിലാണ് എംബസിയുടെ നിര്ദ്ദേശം. യുക്രെയ്ന് സര്ക്കാര് രക്ഷാദൗത്യത്തിനായി പ്രത്യേക ട്രെയിനുകള് അനുവദിച്ചിട്ടുണ്ടെന്നും എംബസി അറിയിച്ചിരുന്നു.
Discussion about this post