ചേങ്കോട്ടുകോണം: ശ്രീരാമദാസമിഷന്‍ യൂണിവേഴ്‌സല്‍ സൊസൈറ്റിയുടെ നേതൃത്വത്തില്‍ കൊല്ലൂര്‍ ശ്രീമൂകാംബികാ ക്ഷേത്ര സന്നിധിയില്‍ ശ്രീരാമദാസമിഷന്‍ അദ്ധ്യക്ഷന്‍ സ്വാമി ബ്രഹ്മപാദാനന്ദ സരസ്വതി തൃപ്പാദങ്ങള്‍ ഭദ്രദീപ പ്രതിഷ്ഠ നടത്തി പ്രയാണം ആരംഭിച്ച ശ്രീരാനവമി രഥയാത്ര കേരളത്തിലെ വിവിധ ജില്ലകളിലും കന്യാകുമാരിയിലും പരിക്രമണം പൂര്‍ത്തിയാക്കി ശ്രീരാമദാസ ആശ്രമത്തില്‍ തിരിച്ചെത്തി. ശ്രീരാമനവമി ദിനമായ ഏപ്രില്‍ 10ന് രാവിലെ 11ന് ജ്യോതിക്ഷേത്ര സന്നിധിയില്‍ ശ്രീരാമനവമി സമ്മേളനം നടക്കും. സമ്മേളനത്തില്‍ എസ്.ആര്‍.ഡി.എം.യൂ.എസ് ഏര്‍പ്പെടുത്തിയ ഇക്കൊല്ലത്തെ ആശ്രമബന്ധു പുരസ്‌കാരങ്ങള്‍ സമ്മാനിക്കും.
വൈകുന്നേരം 5ന് ശ്രീരാമരഥം തിരുവനന്തപുരം കിഴക്കേകോട്ട അഭേദാശ്രമത്തില്‍ എത്തിച്ചേരും. 5.30ന് പാദുകസമര്‍പ്പണ ശോഭായാത്ര ആരംഭിച്ച് പഴവങ്ങാടി വഴി പാളയം ശ്രീ ഹനുമത് സ്വാമി ക്ഷേത്രത്തില്‍ എത്തി 7.30ന് പാദുകസമര്‍പ്പണം നടക്കും. ശേഷം ശ്രീരാമരഥം വാഹനങ്ങളുടെ അകമ്പടിയോടെ ചേങ്കോട്ടുകോണം ശ്രീരാമദാസ ആശ്രമത്തില്‍ എത്തിച്ചേരുന്നതോടെ ഇക്കൊല്ലത്തെ ശ്രീരാനവമി രഥയാത്ര പര്യവസാനിക്കും. രാത്രി 10 മണിക്ക് ചപ്രങ്ങളുടെ വരവും അഭിഷേകവും ആരാധനയും ആചാരപരമായി നടക്കും. 11ന് വെളുപ്പിന് 3.30 ന് ശ്രീരാമപട്ടാഭിഷേകം.
ശ്രീരാമനവമി മഹോത്സവത്തിന്റെ ഭാഗമായി ഏപ്രില്‍ 16ന് ഹനുമത് ജയന്തിയും ജഗദ്ഗുരു സ്വാമി സത്യാനന്ദ സരസ്വതി തൃപ്പാദങ്ങളുടെ വിഗ്രഹപ്രതിഷ്ഠാ വാര്‍ഷികവും പ്രമാണിച്ച് വിശേഷാല്‍ പൂജകള്‍ ഉണ്ടായിരിക്കും.
