വൈക്കം: സ്വകാര്യ വ്യക്തി ക്ഷേത്രത്തിന്റെ ഭൂമി കൈയേറി മതില്‍ പണിതതിനെത്തുടര്‍ന്നു ക്ഷേത്രത്തിന്റെ ഊട്ടുപുരയ്ക്കു സമീപത്തേക്കു ഭക്തര്‍ക്കും വാഹനങ്ങള്‍ക്കും എത്താന്‍ കഴിയുന്നില്ലെന്നു പരാതി.
തിരുവതാംകൂര്‍ ദേവസ്വം ബോര്‍ഡിന്റ കീഴിലുള്ള വൈക്കം ഉദയനാപുരം ശ്രീ സുബ്രഹ്മണ്യ സ്വാമി ക്ഷേത്രത്തിന്റെ വടക്കേനടയോടു ചേര്‍ന്നുള്ള പാതയടക്കമാണ് സ്വകാര്യ വ്യക്തി ലോക്ക്ഡൗണിന്റ മറവില്‍ കൈയേറിയതായി ക്ഷേത്രോപേദേശക സമിതി ആരോപിക്കുന്നത്.
ക്ഷേത്രത്തിലെ ഊട്ടുപുരയുടെ ഇറച്ചാട്ടം അടക്കമുള്ള വസ്തു കൈയേറിയതിനാല്‍ ക്ഷേത്ര ഊട്ടുപുരയില്‍നിന്നു മാലിന്യം നീക്കം ചെയ്യാനുണ്ടായിരുന്ന വഴി അടഞ്ഞു. ഊട്ടുപുരയ്ക്ക് വെളിയില്‍ മാലിന്യങ്ങള്‍ നീക്കം ചെയ്യാന്‍ കഴിയാത്തതിനാല്‍ ചീഞ്ഞളിഞ്ഞ് അസഹ്യമായ ദുര്‍ഗന്ധം വമിക്കുകയാണ്.
ഇത് ഊട്ടുപുരയില്‍ നടക്കുന്ന അന്നദാനം, പഠന ക്ലാസ് എന്നിവയുടെ നിര്‍വഹണത്തെയും ദുഷ്‌കരമാകുകയാണെന്നു പറയുന്നു. ദേവസ്വത്തിന്റെ മരങ്ങള്‍ സ്വകാര്യ വ്യക്തി മതില്‍ പണിയുന്നതിനായി വെട്ടി നശിപ്പിച്ചതുമായി ബന്ധപ്പെട്ടു ദേവസ്വം ബോര്‍ഡ് അന്വേഷണം നടത്തി വരികയാണ്.
ഭക്തജനങ്ങളുടെയും ദേവസ്വം ബോര്‍ഡിന്റെയും സഹകരണത്തോടെ ദേവസ്വം ബോര്‍ഡിന്റെ ഭൂമി തിരിച്ചു പിടിക്കാന്‍ ആക്ഷന്‍ കൗണ്‍സില്‍ രൂപീകരിച്ചു സമര പരിപാടികള്‍ ആരംഭിക്കാന്‍ തീരുമാനിച്ചതായി ക്ഷേത്രോപദേശക സമിതി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
വാര്‍ത്താ സമ്മേളനത്തില്‍ ക്ഷേത്രോപദേശകസമിതി ഭാരവാഹികളായ ചന്ദ്രശേഖരന്‍ നായര്‍, ശിവന്‍കുട്ടി നായര്‍, മോഹന്‍ കാര്‍ത്തിക, ഗിരീഷ് മാവേലിത്തറ, ബിനു ലവ് ലാന്റ്, ബാബു പ്ലാശേരില്‍, രാധാകൃഷ്ണന്‍ ശ്രീലകം, സുധീഷ്, ഷിബു മനയത്ത്, ബിനീഷ്, ചെല്ലപ്പന്‍, ശ്രീകുമാര്‍ തുടങ്ങിയവര്‍ സംബന്ധിച്ചു.
Discussion about this post