തിരുവനന്തപുരം: ഭക്തിയും വിശ്വാസവുമില്ലാത്തവരില് നിന്ന് ക്ഷേത്രഭരണം ഭക്തരെ ഏല്പ്പിക്കാന് സംസ്ഥാന സര്ക്കാര് തയ്യാറാകണമെന്ന് അഖില ഭാരത് സന്ത് സമിതി അഖിലേന്ത്യാ ജനറല് സെക്രട്ടറി ദണ്ഡി സ്വാമി ജിതേന്ദ്രാനന്ദ സരസ്വതി ആവശ്യപ്പെട്ടു. ചേങ്കോട്ടുകോണം ശ്രീരാമദാസ ആശ്രമത്തില് ദക്ഷിണ ഭാരത സന്യാസി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വിശ്വാസികളല്ലാത്തവരുടെ ഉപജീവനത്തിനുള്ള ഉപാധികളല്ല ക്ഷേത്രങ്ങള്. വിശ്വാസങ്ങള്ക്കും ആചാരങ്ങള്ക്കും വിരുദ്ധമായ ശക്തികളാണ് കേരളം ഭരിക്കുന്നത്. ഹിന്ദുമത സ്ഥാപനങ്ങളില് മാത്രമാണ് സംസ്ഥാന സര്ക്കാരിന്റെ കൈകടത്തലുകളെന്നും ഇത് തടയേണ്ട സമയം അതിക്രമിച്ചിരിക്കുന്നുവെന്നും ഇതിനായി ഇതര സന്യാസി സമൂഹത്തെ ഏകോപിപ്പിച്ചുള്ള പ്രവര്ത്തനങ്ങള്ക്ക് രൂപം നല്കുമെന്നും അദ്ദേഹം പറഞ്ഞു.
രാമജന്മഭൂമി ട്രസ്റ്റ് അദ്ധ്യക്ഷനും സന്ത് സമിതി വൈസ് പ്രസിഡന്റുമായ കമല് നയന് ദാസ്ജി മഹാരാജ് അദ്ധ്യക്ഷനായി. കവടിയാര് രാജകുടുംബാംഗം അശ്വതി തിരുനാള് ഗൗരി ലക്ഷ്മിഭായി തമ്പുരാട്ടി മുഖ്യാതിഥിയായിരുന്നു. സന്ത് സമിതി സെക്രട്ടറി ശ്രീശക്തി ശാന്താനന്ദ മഹര്ഷി ആമുഖപ്രഭാഷണം നടത്തി. സ്വാമി ആചാര്യ ധര്മ്മദേവ്, സ്വാമി ഗുരുരത്നം ജ്ഞാനതപസ്വി, സ്വാമി സുപ്രഭാനന്ദ, സ്വാമി ധര്മ്മാനന്ദ, സ്വാമി കൃഷ്ണാനന്ദ സരസ്വതി മുംബൈ, സ്വാമി ശിവാമൃതാനന്ദപുരി, സ്വാമി സായ് ഈശ്വര്, സ്വാമി ആത്മചൈതന്യ, അശോക് തിവാരി, കുമ്മനം രാജശേഖരന് തുടങ്ങിയവര് സംസാരിച്ചു. ക്ഷേത്രവിമോചനം എന്ന വിഷയത്തിലെ ചര്ച്ചയില് ടി. പി. സെന്കുമാര്, വെള്ളിമല വിവേകാനന്ദാശ്രമം മഠാധിപതി സ്വാമി ചൈതന്യാനന്ദ എന്നിവര് പങ്കെടുത്തു. 15ന് രാവിലെ 10.30 ന് നടക്കുന്ന സമാപനസമ്മേളനത്തില് ഗവര്ണര് ആരിഫ് മുഹമ്മദ് ഖാന് മുഖ്യാതിഥിയായി പങ്കെടുക്കും.
Discussion about this post