കൊച്ചി: വെണ്ണല വിദ്വേഷ പ്രസംഗക്കേസില് പി.സി ജോര്ജിന്റെ മുന്കൂര് ജാമ്യാപേക്ഷ കോടതി തള്ളി. എറണാകുളം ജില്ലാ സെഷന്സ് കോടതിയുടെതാണ് ഉത്തരവ്.
സര്ക്കാര് തനിക്കെതിരെ രാഷ്ട്രീയ ലക്ഷ്യങ്ങളോടെ നീങ്ങുകയാണെന്നും ഇത് കളളക്കേസാണെന്നുമായിരുന്നു പി.സി ജോര്ജിന്റെ നിലപാട്. എന്നാല് തിരുവനന്തപുരത്ത് നടത്തിയ വിദ്വേഷ പ്രസംഗത്തിന് സമാനമായ നടപടി പി.സി ജോര്ജ് വീണ്ടും ആവര്ത്തിച്ചത് ഗൂഡലക്ഷ്യങ്ങളോടെയാണെന്ന് സര്ക്കാര് ചൂണ്ടിക്കാട്ടി.
വെണ്ണല തൈക്കാട്ട് മഹാദേവ ക്ഷേത്രത്തില് സപ്താഹയജ്ഞ പരിപാടിയില് ഒരു മതവിഭാഗത്തെ ആക്ഷേപിച്ച് പ്രകോപനപരമായി പ്രസംഗിച്ചെന്നാരോപിച്ചാണ് പി.സി ജോര്ജിനെതിരെ പൊലീസ് ജാമ്യമില്ലാവകുപ്പുചുമത്തി സ്വമേധയാ കേസെടുത്തത്.
പ്രസംഗത്തിന്റെ ഓഡിയോയും ചിത്രങ്ങളും പൊലീസിന് ലഭിച്ചിരുന്നു. വിദ്വേഷപ്രസംഗം ശ്രദ്ധയില്പ്പെട്ട ഉടന് ഉന്നത പൊലീസ് ഉദ്യോഗസ്ഥരുടെ നിര്ദ്ദേശപ്രകാരം ഐ.പി.സി 153 എ, 295 എ വകുപ്പുകള് പ്രകാരം ജാമ്യമില്ലാക്കുറ്റം ചുമത്തി പാലാരിവട്ടം പൊലീസ് കേസെടുക്കുകയായിരുന്നു. സമുദായ സ്പര്ദ്ദയുണ്ടാക്കല്, മനപ്പൂര്വമായി മതവികാരം വ്രണപ്പെടുത്തല് തുടങ്ങിയ കുറ്റങ്ങളാണ് പി.സിക്കെതിരെ ചുമത്തിയിരിക്കുന്നത്.
അതേസമയം പി.സി. ജോര്ജിന്റെ അറസ്റ്റ് ഉടനില്ലെന്ന് കൊച്ചി സിറ്റി പോലീസ് കമ്മീഷണര് സി.ച്ച്. നാഗരാജു. പി.സി. ജോര്ജിനെതിരെ ശക്തമായ തെളിവുകളുണ്ടെന്നും തിരുവനന്തപുരം കോടതിയുടെ ഉത്തരവ് കൂടി അറിഞ്ഞ ശേഷമായിരിക്കും നടപടിയെന്നും കമ്മീഷണര് വ്യക്തമാക്കി.
