തിരുവനന്തപുരം ജില്ലയിലെ പ്രധാന വിനോദസഞ്ചാര കേന്ദ്രമായ കോവളത്തിന് സമീപം വാഴമുട്ടത്താണ് ഈ സുബ്രഹ്മണ്യസ്വാമി ക്ഷേത്രം സ്ഥിതിചെയ്യുന്നത്. ശ്രീ നാരായണഗുരു ദേവന്റെ പാദസ്പര്‍ശം കൊണ്ട് പവിത്രമായ പുണ്യഭൂമിയാണിവിടം. തെക്കന്‍ പളനി എന്നാണ് ഈ ക്ഷേത്രത്തെ പൊതുവേ വിശേഷിപ്പിക്കുന്നത്. പാറക്കെട്ടുകള്‍ കൊണ്ട് ചുറ്റപ്പെട്ടതാണ് ക്ഷേത്രം. പ്രകൃതി ഭംഗി നിറഞ്ഞുതുളുമ്പുന്ന അന്തരീക്ഷം ഈ അമ്പലത്തിനുണ്ട്.
ആദ്ധ്യാത്മിക ജ്ഞാനത്തിന്റെ കുറവുമൂലമുള്ള മനുഷ്യരുടെ ദുരവസ്ഥ മനസിലാക്കിയ ശ്രീനാരായണഗുരുദേവന്‍ കരുണാമൂര്‍ത്തിയായ സുബ്രഹ്മണ്യസ്വാമിയെ പ്രതിഷ്ഠിക്കണമെന്ന് നിര്‍ദ്ദേശിച്ചു. വൈകാതെ തന്നെ ശ്രീ നാരായണ ഗുരു കുന്നുംപാറയില്‍ 1896 വൃശ്ചികമാസം തൃക്കാര്‍ത്തിക നാളില്‍ പൗര്‍ണമിയില്‍ ചതുര്‍ബാഹുവായ ശ്രീ സുബ്രഹ്മണ്യസ്വാമിയുടെ വിഗ്രഹം പ്രതിഷ്ഠിച്ചു. ഗുരുദേവന്റെ ആദ്യത്തെ സുബ്രഹ്മണ്യ പ്രതിഷ്ഠയാണ് കൂടിയാണ് ഈ ക്ഷേത്രത്തിലുള്ളത്.
കുന്നുംപാറ ക്ഷേത്രത്തില്‍ നിന്ന് നോക്കിയാല്‍ കോവളം, ശംഖുമുഖം എന്നീ കടല്‍ തീരങ്ങള്‍ വ്യക്തമായി കാണാം. ക്ഷേത്രത്തില്‍ എത്തുന്നവര്‍ വൈകുന്നേരം ഇവിടെ നിന്ന് സൂര്യാസ്തമയം കാണാതെ മടങ്ങാറില്ല. വെളുപ്പിന് നാലു മണിയോടുകൂടി അമ്പലം തുറക്കും. ഉച്ചയ്ക്ക് 12:30ന് ഗുരുപൂജ കഴിഞ്ഞ് ക്ഷേത്രം അടച്ചിടാറാണ് പതിവ്. അതിനുശേഷം 5 മണി മുതല്‍ 7.30 വരെ ക്ഷേത്രം തുറക്കും.
സുബ്രഹ്മണ്യന്റെ വാഹനമായ മയിലിന്റെ സാന്നിധ്യം ക്ഷേത്രസന്നിധിയിലെ കൗതുകമുണര്‍ത്തുന്ന കാഴ്ചയാണ്. നിലവില്‍ കേന്ദ്ര ടൂറിസം വകുപ്പിന്റെ നേതൃത്വത്തില്‍ ക്ഷേത്ര നവീകരണത്തിനായി തുക അനുവദിച്ചിട്ടുണ്ട്. അത്തി, ഇത്തി, അരയാല്‍ ,പേരാല്‍ എന്നിങ്ങനെയുള്ള വൃക്ഷങ്ങളും ക്ഷേത്രത്തിന് കുളിര്‍മയുള്ള അന്തരീക്ഷം പ്രദാനം ചെയ്യുന്നു.
Discussion about this post