തിരുവനന്തപുരം: സ്കൂളുകള് തുറക്കുന്ന സാഹചര്യത്തില് കുട്ടികളുടെ സുരക്ഷയില് രക്ഷകര്ത്താക്കള്ക്ക് ആശങ്ക വേണ്ടെന്ന് വിദ്യാഭ്യാസ മന്ത്രി വി. ശിവന്കുട്ടി. ആരോഗ്യ വകുപ്പുമായി ചേര്ന്ന് കൊറോണ മാനദണ്ഡങ്ങള് സ്കൂളുകളില് കൃത്യമായി പാലിക്കും. വാക്സിന് ലഭിക്കാത്ത വിദ്യാര്ഥികള്ക്ക് എത്രയും വേഗം നല്കുമെന്നും കുട്ടികളുടെ സുരക്ഷ ഉറപ്പാക്കുമെന്നും മന്ത്രി അറിയിച്ചു.
ഓണ്ലൈന് പഠനം പുതിയ ടൈംടേബിളില് ഇനിയും തുടരും. കുട്ടികളുടെ സുരക്ഷയ്ക്കായി പ്രത്യേകം ട്രാഫിക് പോലീസിനെ നിയമിച്ചിട്ടുണ്ട്. പാലക്കാട് കോട്ടായി മുല്ലക്കര സ്കൂളിന്റെ പ്രശ്നം പരിഹരിക്കുമെന്നും മന്ത്രി ഉറപ്പ് നല്കി.
പുതിയ അധ്യയനവര്ഷത്തിന് ഇന്ന് തുടക്കമാകുന്പോള് ഒന്നു മുതല് പ്ലസ് ടുവരെയുള്ള ക്ലാസുകളിലായി സംസ്ഥാനത്ത് 42.9 ലക്ഷം വിദ്യാര്ഥികളും 1.8 ലക്ഷം അധ്യാപകരുമാണ് സംസ്ഥാനത്തെ സ്കൂളുകളില് എത്തിച്ചേരുക.
ഒന്നാം ക്ലാസിലേക്ക് എത്തുന്നത് നാലുലക്ഷത്തോളം കുരുന്നുകള് ആണ്. കോവിഡ് മഹാമാരിയുടെ അതിതീവ്രത പിന്നിട്ടശേഷമുള്ള ആദ്യ അധ്യയനവര്ത്തില് വിദ്യാര്ഥികള്ക്കും അധ്യാപകര്ക്കും മാസ്ക് നിര്ബന്ധമാണ്.
പ്രവേശനോത്സവത്തിന്റെ സംസ്ഥാന തല ഉദ്ഘാടനം തിരുവനന്തപുരം കഴക്കൂട്ടം ഗവ. ഹയര്സെക്കന്ഡറി സ്കൂളില് ഇന്നു രാവിലെ 9.30ന് മുഖ്യമന്ത്രി പിണറായി വിജയന് നിര്വഹിച്ചു.
വിദ്യാര്ഥികള്ക്കായുള്ള ഒന്നാം ഭാഗം പാഠപുസ്തകങ്ങളും കൈത്തറി യൂണിഫോമുകളും എത്തിച്ചിട്ടുള്ളതായി വിദ്യാഭ്യാസ വകുപ്പ് അറിയിച്ചു. സ്കൂളിന് മുന്നില് പോലീസ് സഹായം ഉണ്ടാകും.
സ്കൂളിന് സമീപം മുന്നറിയിപ്പ് ബോര്ഡുകള്, ട്രാഫിക് മുന്നറിയിപ്പുകള് എന്നിവ സ്ഥാപിക്കണമെന്ന നിര്ദേശവും നല്കിയിട്ടുണ്ട്. സ്കൂള് വാഹനങ്ങളിലെ ജീവനക്കാര്ക്ക് പോലീസ്ക്ലിയറന്സ് സര്ട്ടിഫിക്കറ്റ് നല്കാനും നിര്ദേശമുണ്ട്.
കൂടാതെ സ്കൂള് പരിസരത്തെ കടകളില് പരിശോധന നടത്തും. സ്കൂളിനു മുന്നില് രാവിലെയും വൈകുന്നേരവും പോലീസുകാരെ നിയോഗിക്കണമെന്നും വിദ്യാഭ്യാസ വകുപ്പ് ആവശ്യപ്പെട്ടിട്ടുണ്ടെന്നും പൊതുവിദ്യാഭ്യാസ മന്ത്രി വി.ശിവന്കുട്ടി പറഞ്ഞു.
