തിരുവനന്തപുരം: കാലവര്ഷത്തെ നേരിടാന് കഴിയും വിധം ബി.എം ആന്ഡ് ബി.സി നിലവാരത്തിലുള്ള റോഡുകള് നിര്മ്മിക്കുന്ന നടപടികള് സംസ്ഥാനത്ത് പുരോഗമിക്കുകയാണെന്ന് മന്ത്രി പി.എ.മുഹമ്മദ് റിയാസ് പറഞ്ഞു. മഴക്കാലത്ത് റോഡുകളുമായി ബന്ധപ്പെട്ടുള്ള പരാതികളും ബുദ്ധിമുട്ടുകളും പരിഹരിക്കാന് രൂപീകരിച്ച ടാസ്ക് ഫോഴ്സുകളുടെയും പി.ഡബ്ല്യു.ഡി മഴക്കാല കണ്ട്രോള് റൂമിന്റെയും ഉദ്ഘാടനം നിര്വഹിക്കുകയായിരുന്നു അദ്ദേഹം.
അഞ്ചു വര്ഷംകൊണ്ട് സംസ്ഥാനത്തെ 50 ശതമാനം പി.ഡബ്ല്യു.ഡി റോഡുകള് ബി.എം.ആന്ഡ് ബി.സി. നിലവാരത്തില് നിര്മ്മിക്കുകയാണ് ലക്ഷ്യം.റോഡിലെ കുഴികളുണ്ടാക്കുന്ന വിപത്തുകള് നിസാരമായി കാണാവുന്നതല്ല. മഴയെ അതിജീവിച്ച് റോഡുകള് സുരക്ഷിതമാക്കി നിലനിറുത്തുകയെന്നത് പൊതുമരാമത്ത് വകുപ്പ് വെല്ലുവിളിയായി ഏറ്റെടുത്തിരിക്കുകയാണ്.
കെ.എസ്.ടി.പി ഓഫീസില് പ്രവര്ത്തിക്കുന്ന കണ്ട്രോള് റൂം മുഖേനയാണ് ടാസ്ക് ഫോഴ്സിന്റെ പ്രവര്ത്തനം. 1800-425-7771 എന്ന നമ്പറില് പൊതുജനങ്ങള്ക്ക് പരാതികള് അറിയിക്കാം.കണ്ട്രോള് റൂമില് അറിയിക്കുന്ന പ്രശ്നങ്ങള് അപ്പപ്പോള് ബന്ധപ്പെട്ട ഉദ്യോഗസ്ഥര് ജില്ലാതല ടാസ്ക് ഫോഴ്സിനെ അറിയിക്കും. 48 മണിക്കൂറില് പ്രശ്ന പരിഹാരം ഉറപ്പാക്കാന് ടാസ്ക് ഫോഴ്സിന് കഴിയുമെന്ന് മന്ത്രി പറഞ്ഞു. കെ.എസ്.ടി.പി ഓഫീസില് നടന്ന ചടങ്ങില് പൊതുമരാമത്ത് വകുപ്പ് സെക്രട്ടറി അജിത് കുമാര്, കെ.ആര്.എഫ്.ബി. പി.എം.യു പ്രൊജക്ട് ഡയറക്ടര് ഡാര്ലിന് കര്മലിറ്റ ഡിക്രൂസ്, റോഡ്സ് വിഭാഗം ചീഫ് എന്ജിനിയര് അജിത്ത് രാമചന്ദ്രന്, കെ.എസ്.ടി.പി ചീഫ് എന്ജിനിയര് കെ.എഫ്.ലിസി തുടങ്ങിയവര് പങ്കെടുത്തു.
Discussion about this post