കല്പ്പറ്റ: വയനാട്ടില് എസ് എഫ് ഐ പ്രവര്ത്തകര് ആക്രമിച്ച ഓഫീസ് സന്ദര്ശിച്ച് രാഹുല് ഗാന്ധി. ദൗര്ഭാഗ്യകരമായ സംഭവമാണ് നടന്നതെന്നും ഓഫീസ് ആക്രമിച്ചവരോട് ദേഷ്യമില്ലെന്നും അദ്ദേഹം പറഞ്ഞു.
‘ഇത് രാഹുല് ഗാന്ധിയുടെ ഓഫീസ് മാത്രമല്ല, വയനാട്ടിലെ ജനങ്ങളുടെ ഓഫീസ് കൂടിയാണ്. നിര്ഭാഗ്യകരമായ കാര്യങ്ങളാണ് സംഭവിച്ചത്. രാജ്യത്തിന്റെ എല്ലാ ഭാഗത്തും അക്രമങ്ങളുണ്ടാകുന്നുണ്ട്. എന്നാല് അക്രമം ഒന്നിനും പരിഹാരമല്ല. ഓഫീസ് ആക്രമിച്ചതില് വിഷമമുണ്ട്.
എനിക്കവരോട് ഒരു ദേഷ്യവുമില്ല. ഇതിന്റെ പ്രശ്നങ്ങളെ കുറിച്ച് ചിന്തിക്കാത്ത കുട്ടികളാണ് ചെയ്തത്. ഉത്തരവാദിത്തമില്ലായ്മയാണ് അവര് കാണിച്ചത്. ഓഫീസ് ഉടന് തുറക്കും. ‘ എസ് എഫ് ഐ പ്രവര്ത്തകര് ആക്രമിച്ച തന്റെ ഓഫീസ് സന്ദര്ശിച്ച ശേഷമായിരുന്നു അദ്ദേഹം മാദ്ധ്യമങ്ങളോട് പ്രതികരിച്ചത്. മൂന്ന് ദിവസത്തെ സന്ദര്ശനത്തിനാണ് രാഹുല്ഗാന്ധി വയനാട്ടിലെത്തിയത്.
കഴിഞ്ഞ മാസം 24നായിരുന്നു രാഹുല് ഗാന്ധിയുടെ വയനാട്ടിലെ ഓഫീസില് എസ് എഫ് ഐ ആക്രമണം ഉണ്ടായത്. ബഫര്സോണ് വിഷയത്തില് രാഹുല്ഗാന്ധി ഇടപെടുന്നില്ലെന്ന് ആരോപിച്ചായിരുന്നു ആക്രമണം. കല്പ്പറ്റ കൈനാട്ടിയിലെ എംപി ഓഫീസിലേക്ക് എസ് എഫ് ഐ പ്രവര്ത്തകര് നടത്തിയ മാര്ച്ച് അക്രമാസക്തമാകുകയും സംഘര്ഷത്തില് കലാശിക്കുകയുമായിരുന്നു.
തുടക്കത്തില് പൊലീസ് പ്രവര്ത്തകരെ തടയാന് ശ്രമിച്ചെങ്കിലും ഇവര് പുറകുവശത്തിലൂടെ ഓഫീസിന്റെ രണ്ടാം നിലയിലേയ്ക്ക് അതിക്രമിച്ചു കടക്കുകയായിരുന്നു. പ്രവര്ത്തകര് ഓഫീസിന്റെ ഷട്ടറുകള് കേടുപാടുകള് വരുത്തുകയും, ജനല്ച്ചില്ലുകള് തകര്ക്കുകയും സ്റ്റാഫിനെ മര്ദിച്ചെന്നും സംഭവത്തെത്തുടര്ന്ന് കോണ്ഗ്രസ് ആരോപിച്ചിരുന്നു.
