ടോക്യോ: വെടിയേറ്റ് ഗുരുതരാവസ്ഥയിലായിരുന്ന മുന് ജാപ്പനീസ് പ്രധാനമന്ത്രി ഷിന്സോ ആബെ(67) അന്തരിച്ചു. അല്പസമയം മുന്പാണ് ജാപ്പനീസ് മാധ്യമങ്ങള് ഈ വാര്ത്ത പുറത്തു വിട്ടത്. ജപ്പാന് സര്ക്കാരും മരണവാര്ത്ത ഔദ്യോഗികമായി സ്ഥിരീകരിച്ചിട്ടുണ്ട്. കിഴക്കന് ജപ്പാനിലെ നാര നഗരത്തില് പ്രസംഗിക്കുന്നതിനിടെയാണ് അദ്ദേഹത്തിന് നെഞ്ചില് വെടിയേറ്റത്. 40 കാരനായ പ്രതി യമാഗമിയെ പോലീസ് കസ്റ്റഡിയിലെടുത്തിരുന്നു. ജപ്പാന് നാവികസേന ഉദ്യോഗസ്ഥനായിരുന്നു ഇയാള്. വെടിയേറ്റ ഉടനെ തന്നെ അബോധവസ്ഥയിലായ ഷിന്സെ ആബെയ്ക്ക് ഹൃദയാഘാതം ഉണ്ടായതായും മരുന്നുകളോട് ശരീരം പ്രതികരിക്കുന്നില്ലെന്നും നേരത്തെ മാധ്യമങ്ങള് റിപ്പോര്ട്ട് ചെയ്തിരുന്നു. യുദ്ധാനന്തര ജപ്പാന് കണ്ട ഏറ്റവും കരുത്തുറ്റ രാഷ്ട്രീയ നേതാവായിരുന്ന ഷിന്സോ ആബെ ആഗോളതലത്തില് നിര്ണായക സ്വാധീനമുള്ള വ്യക്തിതത്വമായിരുന്നു. ഇന്ത്യയുമായും ഇന്ത്യന് പ്രധാനമന്ത്രി നരേന്ദ്രമോദിയുമായും സവിശേഷ സൗഹൃദം അദ്ദേഹം കാത്തുസൂക്ഷിച്ചിരുന്നു. 2020 ഓഗസ്റ്റിലാണ് അദ്ദേഹം പ്രധാനമന്ത്രിസ്ഥാനം സ്വമേധയാ ഒഴിഞ്ഞത്.
Discussion about this post