തിരുവനന്തപുരം: മുഖ്യമന്ത്രിക്കെതിരെ ഇന്ഡിഗോ വിമാനത്തില് പ്രതിഷേധിച്ച യൂത്ത് കോണ്ഗ്രസ് പ്രവര്ത്തകരെ കൈകാര്യം ചെയ്ത എല്.ഡി.എഫ് കണ്വീനര് ഇ പി ജയരാജനെതിരെ കേസെടുക്കാന് ഉത്തരവ്. തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതിയുടേതാണ് ഉത്തരവ്. വധശ്രമം, ക്രിമിനല് ഗൂഢാലോചന എന്നിവ ചുമത്തി കേസെടുക്കാനാണ് നിര്ദ്ദേശം.
വലിയതുറ പൊലീസിനാണ് കോടതിയുടെ നിര്ദേശം. മുഖ്യമന്ത്രിയുടെ രണ്ട് പേഴ്സണല് സ്റ്റാഫുകള്ക്കെതിരെയും കേസെടുക്കാന് ഉത്തരവുണ്ട്. ഇ.പി.ജയരാജന്, മുഖ്യമന്ത്രിയുടെ പേഴ്സണല് സ്റ്റാഫ് അംഗങ്ങളായ അനില് കുമാര്, വി.എം.സുനീഷ് എന്നിവര്ക്കെതിരെയാണ് എഫ്.ഐ.ആര് റജിസ്റ്റര് ചെയ്യുക.
ജൂണ് പന്ത്രണ്ടിന് കണ്ണൂരില് നിന്നും തിരുവനന്തപുരത്തേക്കുള്ള മുഖ്യമന്ത്രിയുടെ വിമാനയാത്രയ്ക്കിടയിലായിരുന്നു നാടകീയ സംഭവങ്ങള് അരങ്ങേറിയത്. യൂത്ത് കോണ്ഗ്രസ് പ്രവര്ത്തകരായ തലശ്ശേരി സ്വദേശി ഫര്സീന് മജീദ്, പട്ടന്നൂര് സ്വദേശി ആര്. കെ. നവീന് എന്നിവരാണ് വിമാനത്തില് പ്രതിഷേധിച്ചത്. ഇവരെ ജയരാജന് തള്ളി മാറ്റുകയായിരുന്നു.
പ്രതിഷേധിച്ച ഫര്സീന് മജീദ്, ആര്.കെ നവീന് കുമാര് എന്നിവരാണ് ജയരാജനും മുഖ്യമന്ത്രിയുടെ സ്റ്റാഫിനുമെതിരെ കേസ് എടുക്കണമെന്ന് ആവശ്യപ്പെട്ട് കോടതിയെ സമീപിച്ചത്. വിമാനത്തില് പ്രതിഷേധിച്ചവരെ ഇ.പി.ജയരാജന് മര്ദിച്ചുവെന്ന് പരാതിയില് പറയുന്നുണ്ട്. പൊലീസിന് നേരത്തെ തന്നെ പരാതി നല്കിയിട്ടും നടപടിയെടുക്കാത്തതിനാലാണ് കോടതിയെ സമീപിക്കുന്നതെന്നും ഇവര് ചൂണ്ടിക്കാട്ടി.
ഇതിനിടെ, പ്രവര്ത്തകരെ തള്ളിമാറ്റിയ സംഭവത്തില് കഴിഞ്ഞ ദിവസം ഇന്ഡിഗോ കമ്പനി ജയരാജന് മൂന്ന് ആഴ്ചത്തെ യാത്രാവിലക്ക് ഏര്പ്പെടുത്തിയിരുന്നു. പ്രതിഷേധിച്ച യൂത്ത് കോണ്ഗ്രസ് പ്രവര്ത്തകര്ക്ക് രണ്ടാഴ്ചത്തെ വിലക്കും ഏര്പ്പെടുത്തിയിട്ടുണ്ട്.
