കൊച്ചി: ഇരുനില വീട് ഇടിഞ്ഞ് താഴ്ന്ന് പതിമൂന്നുകാരന്‍ മരിച്ചു. കാവില്‍തോട്ടം മനയില്‍ ഹരിനാരായണന്‍ ആണ് മരിച്ചത്. പെരുമ്പാവൂരില്‍ കീഴില്ലം സൗത്തു പരുത്തിവേലിപ്പടിയില്‍ രാവിലെ ഏഴ് മണിയോടെയായിരുന്നു അപകടം.
സംഭവസമയത്ത് കുട്ടിയുടെ മുത്തച്ഛന്‍ നാരായണന്‍ നമ്പൂതിരി അടക്കം ഏഴ് പേര്‍ വീട്ടിലുണ്ടായിരുന്നു. നാരായണന്‍ നമ്പൂതിരിക്കും ഗുരുതരമായി പരിക്കേറ്റു. ഇദ്ദേഹം ആലുവയിലെ സ്വകാര്യ ആശുപത്രിയില്‍ ചികിത്സയിലാണ്.
അപകടം നടക്കുന്ന സമയത്ത് കുട്ടിയും മുത്തച്ഛനും മാത്രമായിരുന്നു താഴത്തെ നിലയിലുണ്ടായിരുന്നത്. കുട്ടി ഉറങ്ങുകയായിരുന്നു. ശബ്ദം കേട്ടെത്തിയ നാട്ടുകാരാണ് അഗ്‌നിരക്ഷാ സേനയെ വിവരമറിയിച്ചത്. നാരായണന്‍ നമ്പൂതിരി അടക്കമുള്ളവരെ പുറത്തെടുത്ത് ആശുപത്രിയിലെത്തിച്ചെങ്കിലും, ഹരിനാരായണനെ രക്ഷിക്കാനായില്ല. പ്രദേശത്ത് കഴിഞ്ഞ ദിവസങ്ങളില്‍ മഴയുണ്ടായിരുന്നു. പുതിയ വീടാണെന്ന് നാട്ടുകാര്‍ വ്യക്തമാക്കി.
Discussion about this post