തിരുവനന്തപുരം: സംസ്ഥാനത്ത് വീണ്ടും അതിതീവ്ര മഴയുണ്ടാകുമെന്ന് കാലാവസ്ഥാ വകുപ്പിന്റെ മുന്നറിയിപ്പ്. ഇതേതുടര്ന്ന് എട്ട് ജില്ലകളില് റെഡ് അലര്ട്ടും അഞ്ച് ജില്ലകളില് ഓറഞ്ച് അലര്ട്ടും പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, കണ്ണൂര് ജില്ലകളിലാണ് റെഡ് അലര്ട്ട് പ്രഖ്യാപിച്ചത്. ഈ ജില്ലകളില് അതീവ ജാഗ്രതാ നിര്ദ്ദേശം നല്കിയിട്ടുണ്ട്.
കൊല്ലം, മലപ്പുറം, കോഴിക്കോട്, വയനാട്, കാസര്ഗോഡ് എന്നീ അഞ്ച് ജില്ലകളിലാണ് ഓറഞ്ച് അലര്ട്ട്. തിരുവനന്തപുരം ജില്ലയില് യെല്ലോ അലര്ട്ടും പ്രഖ്യാപിച്ചു. അതിതീവ്ര മഴ മുന്നറിയിപ്പ് പ്രഖ്യാപിച്ചതിന് പിന്നാലെ ജില്ലാ ഭരണകൂടങ്ങളോട് കൂടുതല് ജാഗ്രത പാലിക്കാന് സര്ക്കാര് നിര്ദ്ദേശിച്ചിട്ടുണ്ട്.
പത്തനംതിട്ട ജില്ലയിലെ പമ്പ, അച്ചന്കോവില്, മണിമല ആറുകളില് ജലനിരപ്പ് ക്രമാതീതമായി ഉയര്ന്നു. മീനച്ചിലാറിന്റെ പലഭാഗത്തും വെള്ളപ്പൊക്ക ഭീഷണിയുണ്ട്. കോട്ടയത്തിന്റെ പടിഞ്ഞാറന് മേഖലയായ ഇല്ലിക്കല്, കുമരകം, തിരുവാര്പ്പ്, അയ്മനം, പരിപ്പ്, തിരുവാതുക്കല് മേഖലകള് വെള്ളപ്പൊക്ക ഭീഷണിയിലാണ്. ഇല്ലിക്കല്-കുമരകം റോഡില് വെള്ളം കയറിയിട്ടുണ്ട്.
തൃശൂരില് അതീവ ഗുരുതരമായ സാഹചര്യം നിലനില്ക്കുന്നുവെന്നാണ് ജില്ലാ ഭരണകൂടത്തിന്റെ മുന്നറിയിപ്പ്. ചാലക്കുടി പുഴയില് ജലനിരപ്പ് ഉയരുമെന്നും തീരത്ത് താസമിക്കുന്നവര് സുരക്ഷിത കേന്ദ്രങ്ങളിലേക്ക് മാറണമെന്നും തൃശൂര് കളക്ടര് അറിയിച്ചിട്ടുണ്ട്. ചാലക്കുടിയില് അടുത്ത ഒരു മണിക്കൂറിനുള്ളില് അതിതീവ്ര മഴ പെയ്യുമെന്നും മുന്നറിയിപ്പുണ്ട്. ഇടുക്കിയുടെ പല ഭാഗങ്ങളിലും മണ്ണിടിച്ചില് രൂക്ഷമാണ്. പലയിടത്തും ഗതാഗതം ഭാഗികമായി തടസപ്പെട്ടിട്ടുണ്ട്.
Discussion about this post