തിരുവനന്തപുരം: വിഴിഞ്ഞത്ത് സമരം നടത്തുന്നത് പുറത്തുനിന്നെത്തിയവരെന്ന് മന്ത്രി അഹമ്മദ് ദേവര് കോവില്. സമരത്തില് വിഴിഞ്ഞത്തെ ജനങ്ങള്ക്ക് പങ്കില്ലെന്നും സര്ക്കാര് വിഴിഞ്ഞത്തെ പൗരപ്രമുഖരുമായും അവിടുത്തെ ജനപ്രതിനിധികളുമായി വിശദമായി ചര്ച്ച നടത്തിയിരുന്നുവെന്നും അദ്ദേഹം പറഞ്ഞു.
കടല്ക്ഷോഭത്തിന് കാരണം തുറമുഖ നിര്മാണം മാത്രമല്ല കാലാവസ്ഥ വ്യതിയാനവും കാരണമാണ്. ഈ വിഷയത്തില് ആരുമായും സംസാരിക്കാന് തയാറാണ്. എന്തെങ്കിലും പ്രശ്നമുണ്ടെങ്കില് അത് പരിഹരിക്കാനുള്ള നടപടിയുമായാണ് സര്ക്കാര് മുന്നോട്ടുപോകുന്നതെന്നും അദ്ദേഹം പറഞ്ഞു. അതേസമയം, വിഴിഞ്ഞത്ത് സമരക്കാരെ ശാന്തരാക്കാന് പോലീസ് സമവായ നീക്കത്തിന് ശ്രമിക്കുകയാണ്. മൂന്ന് വൈദികരെ തുറമുഖത്തിന്റെ ഉള്ളിലേക്ക് കൊണ്ടുപോയി.
നിര്മാണ പ്രവര്ത്തനങ്ങള് ഒന്നും നടക്കുന്നില്ലെന്ന് ബോധ്യപ്പെടുത്തുക എന്നതാണ് പോലീസിന്റെ ഉദ്ദേശം. പോലീസ് വാഹനത്തിലാണ് വൈദികരെ തുറമുഖത്തിന്റെ ഉള്ളിലേക്ക് കൊണ്ടുപോയത്. സമരക്കാര് തുറമുഖ കവാടത്തിന് മുന്നില് നിലയുറപ്പിച്ചിരിക്കുകയാണ്. ലത്തീന് അതിരൂപതയുടെ നേതൃത്വത്തിലാണ് മത്സ്യത്തൊഴിലാളികള് പ്രതിഷേധിക്കുന്നത്. സ്ത്രീകളും കുട്ടികളും ഉള്പ്പടെ നൂറുകണക്കിന് ആളുകള് ഇവിടെ തടിച്ചു കൂടിയിട്ടുണ്ട്. ബാരിക്കേഡ് വച്ച് പോലീസ് പ്രതിഷേധക്കാരെ തടഞ്ഞിരിക്കുകയാണ്. ഉന്നത ഉദ്യോഗസ്ഥരുള്പ്പടെ നിരവധി പോലീസുകാര് സ്ഥലത്ത് നിലയുറപ്പിച്ചുണ്ട്. തുറമുഖ കവാടത്തിന് ഉള്ളിലേക്ക് കടക്കാന് ശ്രമിച്ചാല് ലാത്തി വീശുമെന്ന് പോലീസുകാര് മുന്നറിയിപ്പ് നല്കിയിട്ടുണ്ട്.
പ്രതിഷേധക സൂചകമായി ഇന്ന് രാവിലെ ലത്തീന് അതിരൂപതയുടെ കീഴിലുള്ള എല്ലാ പള്ളികളിലും കരിങ്കൊടി ഉയര്ത്തിയിരുന്നു. വിഴിഞ്ഞം തുറമുഖ നിര്മാണം നിര്ത്തിവെച്ച് കൃത്യമായ പഠനം നടത്തുക, പുനരധിവാസ പദ്ധതികള് വേഗത്തില് നടപ്പാക്കുക, അപകടത്തില്പ്പെടുന്ന മത്സ്യത്തൊഴിലാളികള്ക്ക് ധനസഹായം ഉറപ്പാക്കുക, തീര ശോഷണം തടയാന് നടപടി എടുക്കുക തുടങ്ങി ഏഴ് ആവശ്യങ്ങള് ഉന്നയിച്ചാണ് സമരം.
Discussion about this post