തിരുവനന്തപുരം: വിഴിഞ്ഞം അന്താരാഷ്ട്ര തുറമുഖ നിര്‍മാണത്തിന്റെ ഭാഗമായുണ്ടായ തീരശോഷണം മൂലം വീടും തൊഴിലും നഷ്ടമായവരെ പുനരധിവസിപ്പിക്കണമെന്നത് ഉള്‍പ്പെടെയുള്ള ആവശ്യങ്ങള്‍ ഉന്നയിച്ച് തിരുവനന്തപുരം ലത്തീന്‍ അതിരൂപതയുടെ നേതൃത്വത്തില്‍ നടത്തിവരുന്ന സമരം അവസാനിപ്പിക്കാനുള്ള നീക്കങ്ങളുമായി സംസ്ഥാന സര്‍ക്കാര്‍.
ദിവസങ്ങളായി സമരം നടത്തുന്ന തീരദേശ ജനതയുമായി സര്‍ക്കാര്‍ തലത്തില്‍ ചര്‍ച്ചകള്‍ നടത്താത്തതിനെതിരേ രൂക്ഷമായ പ്രതിഷേധം വിവിധ കോണുകളില്‍നിന്ന് കഴിഞ്ഞ ദിവസങ്ങളില്‍ ഉയര്‍ന്നിരുന്നു. ഇതേത്തുടര്‍ന്നാണ് ചര്‍ച്ചയ്ക്ക് തയാറാകുന്നത്.
ഫിഷറീസ് മന്ത്രി വി. അബ്ദുറഹ്മാന്‍ വ്യാഴാഴ്ച സമരസമിതി ജനറല്‍ കണ്‍വീനര്‍ മോണ്‍. യൂജിന്‍ എച്ച്. പെരേരയെ ഫോണില്‍ വിളിച്ചു. ഡല്‍ഹിയിലുള്ള മന്ത്രി ഇന്നു രാവിലെ കൊച്ചിയിലെത്തും.
തിരുവനന്തപുരത്ത് എത്തിച്ചേര്‍ന്ന ശേഷം വീണ്ടും സമരസമിതി ഭാരവാഹികളെ ബന്ധപ്പെട്ട് ചര്‍ച്ച എപ്പോള്‍ നടത്തണമെന്ന കാര്യത്തില്‍ തീരുമാനമുണ്ടാകും. ഇന്നു വൈകുന്നേരം ചര്‍ച്ച നടത്താനാണ് സാധ്യത.
Discussion about this post