തിരുവനന്തപുരം: വിഴിഞ്ഞം സമരം ഒത്തുതീര്‍പ്പാക്കാനായി മുഖ്യമന്ത്രി പിണറായി വിജയന്‍ സമരസമിതിയുമായി നടത്തിയ അനൗദ്യോഗിക ചര്‍ച്ച പരാജയം. സമരം തുടരുമെന്ന് സമരസമിതി അറിയിച്ചു. മുഖ്യമന്ത്രി പിണറായി വിജയനുമായി തിരുവനന്തപുരം ലത്തീന്‍ അതിരൂപത ആര്‍ച്ച്ബിഷപ് ഡോ. തോമസ് ജെ. നെറ്റോ, വികാരി ജനറാള്‍ മോണ്‍. യൂജിന്‍ പെരേര എന്നിവര്‍ ക്ലിഫ് ഹൗസില്‍വച്ചാണ് ചര്‍ച്ച നടത്തിയത്.
വിഴിഞ്ഞം തുറമുഖനിര്‍മാണം നിര്‍ത്തിവയ്ക്കാനാകില്ലെന്ന് മുഖ്യമന്ത്രി സമരക്കാരെ അറിയിച്ചു. പുനരധിവാസം സംബന്ധിച്ചും ചര്‍ച്ച നടന്നു. ചര്‍ച്ചയില്‍ അന്തിമതീരുമാനമാകാതെ പിരിയുകയായിരുന്നു.
വിഴിഞ്ഞം തുറമുഖ പദ്ധതിക്കെതിരേ നടത്തുന്ന സമരത്തില്‍നിന്ന് സംരക്ഷണം തേടി അദാനി ഗ്രൂപ്പ് ഹൈക്കോടതിയെ സമീപിച്ച സാഹചര്യത്തിലുള്ള സ്ഥിതി വിശേഷം സംബന്ധിച്ച് ആര്‍ച്ച്ബിഷപ് മുഖ്യമന്ത്രിയുമായി സംസാരിച്ചു. സമരം ഒത്തുതീര്‍ക്കുന്നതു സംബന്ധിച്ച് വരും ദിവസങ്ങളില്‍ ചര്‍ച്ച തുടരുമെന്ന് വികാരി ജനറാള്‍ മോണ്‍, യൂജിന്‍ പെരേര പറഞ്ഞു.
ഫിഷറീസ് മന്ത്രി ആന്റണി രാജുവുമായി രണ്ടുതവണ നടത്തിയ ചര്‍ച്ച നേരത്തേ പരാജയപ്പെട്ടിരുന്നു. വിഴിഞ്ഞം തുറമുഖ പദ്ധതിക്കെതിരേ നടത്തുന്ന സമരം ഇന്ന് പതിനൊന്നാം ദിവസത്തിലേക്കു കടക്കുകയാണ്.
അതേസമയം വിഴിഞ്ഞത്ത് സമരം ചെയ്യുന്ന മത്സ്യത്തൊഴിലാളികളുടെ ആവശ്യം ന്യായമെന്ന് സിപിഐ തൃശൂര്‍ ജില്ലാ സമ്മേളനം. മത്സ്യത്തൊഴിലാളികള്‍ക്കായി സമഗ്ര പാക്കേജ് വേണമെന്നും സമ്മേളനത്തില്‍ പ്രമേയം അവതരിപ്പിച്ചു. സംസ്ഥാന ഭരണത്തിനെതിരേയും സമ്മേളനത്തില്‍ വിര്‍മശനമുയര്‍ന്നു. മുഖ്യമന്ത്രിയുടെ കീഴിലുള്ള ആഭ്യന്തരവകുപ്പ് പരാജയമാണ്. കെ. രാജനൊഴികെ സിപിഐ മന്ത്രിമാരുടെ പ്രകടനം മികച്ചതല്ലെന്നും സമ്മേളനം വിമര്‍ശിച്ചു.
