കൊച്ചി: വിഴിഞ്ഞത്തെ തീരദേശവാസികളുടെ പ്രതിഷേധം തുറമുഖ നിര്മാണപ്രവര്ത്തനങ്ങള് തടസപ്പെടുത്തിക്കൊണ്ടാകരുതെന്ന് ഹൈക്കോടതി. പദ്ധതിയുടെ നിര്മാണം നിര്ത്തിവയ്ക്കാനാകില്ലെന്നും കോടതി വ്യക്തമാക്കി. തുറമുഖ നിര്മാണത്തിന് പോലീസ് സുരക്ഷ നല്കണമെന്നാവശ്യപ്പെട്ട് അദാനി ഗ്രൂപ്പ് സമര്പ്പിച്ച ഹര്ജിയിലാണ് കോടതി പരാമര്ശം. നിര്മാണപ്രവര്ത്തനങ്ങള് മുന്നോട്ട് നീങ്ങുന്നില്ലെന്നു അദാനി ഗ്രൂപ്പ് കോടതിയില് അറിയിച്ചു.
പദ്ധതി പൂര്ണമായും നിശ്ചല അവസ്ഥയിലാണ്. പോലീസ് പ്രതിഷേധക്കാര്ക്ക് കൂട്ടു നില്ക്കുകയാണ്. വിഴിഞ്ഞം തുറമുഖ നിര്മാണത്തെ സ്വകാര്യ പദ്ധതിയായി ചിത്രീകരിക്കാനാവില്ല. ദേശീയപ്രാധാന്യമുള്ള പദ്ധതിയാണിതെന്നും പൊതുപണമടക്കം ചെലവഴിച്ചാണ് നിര്മാണപ്രവര്ത്തനങ്ങള് നടക്കുന്നതെന്നും അദാനി ഗ്രൂപ്പ് കോടതിയില് പറഞ്ഞു.
നിര്മാണപ്രവര്ത്തനങ്ങള് നിര്ത്തിവയ്ക്കണമെന്ന് കോടതിക്ക് ഉത്തരവിടാനാകില്ലെന്നു കോടതി വാക്കാല് പറഞ്ഞു. നിയമത്തിന്റെ പരിധിയില് നിന്നുള്ള പ്രതിഷേധങ്ങള് നടത്താം. പദ്ധതി സംബന്ധിച്ച് പ്രതിഷേധമുള്ളവര്ക്ക് ഉചിതമായ ഫോറത്തില് അക്കാര്യം അറിയിക്കാമെന്നും കോടതി വ്യക്തമാക്കി. അതേസമയം സമാധാനപരമായ സമരമാണ് നടക്കുന്നതെന്ന് സമരസമിതി കോടതിയില് അറിയിച്ചു.
Discussion about this post