ന്യൂഡല്ഹി: പേ വിഷബാധയ്ക്കുള്ള വാക്സിന്റെ ഗുണനിലവാരം സംബന്ധിച്ച് ഡ്രഗ്സ് കണ്ട്രോളര് ജനറലിനോട് കേന്ദ്രം റിപ്പോര്ട്ട് തേടി. കേരളം നല്കിയ കത്തിന്റെ അടിസ്ഥാനത്തിലാണ് നടപടിയെന്ന് കേന്ദ്ര ആരോഗ്യമന്ത്രി മന്സൂഖ് മാണ്ഡവ്യ വ്യക്തമാക്കി.
ആരോഗ്യമന്ത്രി വീണാ ജോര്ജാണ് വാക്സിന്റെ ഗുണനിലവാരം പരിശോധിക്കണമെന്ന് ആവശ്യപ്പെട്ട് കേന്ദ്രത്തിനു കത്ത് നല്കിയത്. വാക്സിനെടുത്തിട്ടും പേ വിഷബാധയേറ്റ് ആളുകള് മരിക്കുന്ന സംഭവങ്ങള് സംസ്ഥാനത്ത് റിപ്പോര്ട്ട് ചെയ്തതിനെ തുടര്ന്നാണ് കത്തയച്ചത്.
വാക്സിന്റെ ഗുണനിലവാരം സംബന്ധിച്ച് പരിശോധന നടത്താന് കേന്ദ്ര ആരോഗ്യമന്ത്രാലയം ഡ്രഗ്സ് കണ്ട്രോളര് ജനറലിനോട് ആവശ്യപ്പെട്ടു. രണ്ടാഴ്ചയ്ക്കം ഇതു സംബന്ധിച്ച റിപ്പോര്ട്ട് നല്കുമെന്നാണ് വിവരം.
കേന്ദ്ര ഡ്രഗ്സ് ലബോറട്ടറിയില് പരിശോധിച്ച് ഗുണനിലവാരം ഉറപ്പാക്കിയ വാക്സിനും സെറവുമാണ് നായ്ക്കളില് നിന്നുള്ള കടിയേറ്റ് ആശുപത്രികളില് എത്തിയവര്ക്ക് നല്കിയത്. എന്നിട്ടും വാക്സിനെടുത്തവര് മരിച്ചത് ആശങ്ക സൃഷ്ടിച്ചിരുന്നു.
Discussion about this post