പാലക്കാട്: വടക്കഞ്ചേരിയില് കെ.എസ്.ആര്.ടി.സി ബസിന് പിന്നില് ടൂറിസ്റ്റ് ബസ് ഇടിച്ചുണ്ടായ അപകടത്തില് മരണം ഒന്പതായി. പാലക്കാട് വടക്കഞ്ചേരി അഞ്ചുമൂര്ത്തി മംഗലം കൊല്ലത്തറ ബസ്റ്റോപ്പിന് സമീപത്ത് അര്ദ്ധരാത്രി 12.30 ഓടെയാണ് സംഭവം. എറണാകുളം മുളന്തുരുത്തി വെട്ടിക്കല് മാര് ബസേലിയോസ് വിദ്യാനികേതന് സ്കൂളില് നിന്ന് ഊട്ടിയിലേക്ക് വിനോദയാത്രയ്ക്ക് പോയ കുട്ടികള് സഞ്ചരിച്ച ബസ് കൊട്ടാരക്കരയില് നിന്ന് കോയമ്പത്തൂരേക്ക് പോവുകയായിരുന്ന കെ.എസ്.ആര്.ടി.സി ബസിന്റെ പിന്നിലിടിച്ച് മറിയുകയായിരുന്നു.
ആറു പുരുഷന്മാരും മൂന്നു സ്ത്രീകളും മരിച്ചിട്ടുണ്ട്. കെഎസ്ആര്ടിസി യാത്രക്കാരായ തൃശൂര് നടത്തറ കൊഴുക്കുള്ളി ഗോകുലം രോഹിത് രാജ് (24), കൊല്ലം വള്ളിയോട് വൈദ്യന്കുന്ന് ശാന്തിമന്ദിരം ഒ.അനൂപ് (22), സ്കൂള് ജീവനക്കാരായ നാന്സി ജോര്ജ്, വി.കെ.വിഷ്ണു എന്നിവര് മരിച്ചവരില് ഉള്പ്പെടുന്നു. അന്പതോളം പേര്ക്ക് പരിക്കേറ്റിട്ടുണ്ടെന്നാണ് പൊലീസ് പറയുന്നത്. മരണ സംഖ്യ ഇനിയും ഉയര്ന്നേക്കാമെന്നും ആശങ്കയുണ്ട്.
അമിതവേഗത്തിലെത്തിയ ടൂറിസ്റ്റ്ബസ് സൂപ്പര് ഫാസ്റ്റിനെ മറികടക്കാന് ശ്രമിക്കുന്നതിനിടെ പിന്നിലിടിക്കുകയും നിയന്ത്രണംവിട്ട് മറിയുകയുമായിരുന്നു. പരിക്കേറ്റവരെ പാലക്കാട് ജില്ലാ ആശുപത്രി, ആലത്തൂര് താലൂക്ക് ആശുപത്രി എന്നിവിടങ്ങളിലേക്കും തൃശ്ശൂരിലെ ആശുപത്രികളിലേക്കും മാറ്റി. ഗുരുതരമായി പരിക്കേറ്റ പിറവം സ്വദേശി എല്ദോയെ തൃശ്ശൂരിലെ ആശുപത്രിയിലേക്ക് കൊണ്ടുപോയി.
ആകെ 10 പേരെയാണ് പാലക്കാട് ജില്ലാശുപത്രിയിലെത്തിച്ചത്. തിരിച്ചറിയാത്ത നിലയിലായിരുന്നു മൃതദേഹങ്ങള്. ജില്ലാ ആശുപത്രിയില് ചികിത്സയിലുള്ളവര്: മുഹമ്മദ് ഹാഷിം (പന്തളം), മനോജ് (കല്ലേപ്പുള്ളി), പ്രവീണ് വര്ഗീസ് (തിരുപ്പൂര്), വിഷ്ണു (മൂവാറ്റുപുഴ), അബ്ദുള് റൗഫ് (പൊന്നാനി).
തൃശ്ശൂരില് ചികിത്സയിലുള്ളവര്: ഹരികൃഷ്ണന് (22), അമേയ (17), അനന്യ (17), ശ്രദ്ധ (15), അനീജ (15), അമൃത (15), തനുശ്രീ (15), ഹിന് ജോസഫ് (15), ജനീമ (15), അരുണ്കുമാര് (38), ബ്ലെസ്സന് (18), എല്സില് (18), എല്സ (18).
