കൊച്ചി: ഗവര്ണര് ആരിഫ് മുഹമ്മദ് ഖാന് രാജി ആവശ്യപ്പെട്ട ഒന്പത് സര്വകലാശാലകളിലെ വൈസ് ചാന്സലര്മാര്ക്ക് തത്കാലം തുടരാമെന്ന് ഹൈക്കോടതി. സര്വകലാശാല ചാന്സലര് കൂടിയായ ഗവര്ണറുടെ അന്തിമ ഉത്തരവ് വരെ വിസിമാര്ക്ക് തുടരാമെന്ന് ജസ്റ്റീസ് ദേവന് രാമചന്ദ്രന്റെ ബെഞ്ച് വ്യക്തമാക്കി.
രാജി ആവശ്യപ്പെട്ട് ഗവര്ണര് കത്തയച്ചത് ശരിയായില്ലെന്നും കോടതി നിരീക്ഷിച്ചു. നിയമപ്രകാരം മാത്രമേ വിസിമാര്ക്കെതിരെ നടപടി പാടുള്ളു. ഗവര്ണര് വിസിമാര്ക്ക് കാരണം കാണിക്കല് നോട്ടീസ് നല്കിയതോടെ രാജി ചോദിച്ച കത്ത് അസാധുവായെന്നും കോടതി വ്യക്തമാക്കി.
ഗവര്ണര് നല്കിയ കാരണം കാണിക്കല് നോട്ടീസില് വിസിമാര്ക്ക് വിശദീകരണം നല്കാം. വിശദീകരണം കേട്ടശേഷം ഗവര്ണര്ക്ക് അന്തിമ നടപടി സ്വീകരിക്കാമെന്നും കോടതി അറിയിച്ചു.
നവംബര് മൂന്നിനുള്ളില് വിശദീകരണം നല്കണമെന്നാണ് ഗവര്ണര് വിസിമാരോട് ആവശ്യപ്പെട്ടിരിക്കുന്നത്. നിയമനം റദ്ദാക്കാതിരിക്കാന് കാരണമറിയിക്കണമെന്നാണ് നോട്ടീസില് ആവശ്യപ്പെട്ടിരിക്കുന്നത്. ഇതോടെ വിസിമാര്ക്ക് തങ്ങളുടെ ഭാഗം വ്യക്തമാക്കാന് പത്ത് ദിവസം കൂടി ലഭിക്കും.
വിസി നിയമനം യുജിസി ചട്ടങ്ങള്ക്ക് വിരുദ്ധമായി എന്നതാണ് പ്രശ്നമെന്നും ഗവര്ണര് പറഞ്ഞു. ചില വിസിമാര് മികച്ചവരാണ്, പക്ഷേ സുപ്രീം കോടതി വിധി തനിക്ക് നടപ്പാക്കണം. സുപ്രീം കോടതി ആര്ക്കും ഇളവ് കൊടുത്തിട്ടില്ല. മികച്ച പ്രകടനം കാഴ്ചവച്ച വിസിമാരോട് അനുകമ്പയെന്നും ഗവര്ണര് പറഞ്ഞു.
എന്നാല് ഡിജിറ്റല്, ശ്രീനാരായണ വിസിമാര്ക്കെതിരേ നടപടിയുണ്ടാകുമെന്നും ഗവര്ണര് വിശദമാക്കി. വിസിമാരോട് രാജി വേണ്ടെന്ന് പറഞ്ഞത് എല്ഡിഎഫ് ആണ്. വിസിമാര്ക്ക് വേണമെങ്കില് വീണ്ടും അപേക്ഷിക്കാം. യോഗ്യതയുണ്ടെങ്കില് സ്ഥാനത്ത് വരാം. സ്വാഭാവിക നീതി നിഷേധിച്ചിട്ടില്ല. ഒരു വിസിയേയും പുറത്താക്കിയിട്ടില്ലെന്നും ഗവര്ണര് പറഞ്ഞു.
Discussion about this post