തിരുവനന്തപുരം: മാധ്യമപ്രവര്ത്തകര്ക്ക് നേരെ വിഴിഞ്ഞം സമരക്കാരുടെ കൈയേറ്റം. വിഴിഞ്ഞം തുറമുഖത്തിനെതിരെ ലത്തീന് അതിരൂപതയുടെ നേതൃത്വത്തില് നടക്കുന്ന സമരം റിപ്പോര്ട്ട് ചെയ്യാനെത്തിയ മാധ്യമപ്രവര്ത്തരെയാണ് പ്രതിഷേധക്കാര് വളഞ്ഞിട്ട് ആക്രമിച്ചത്. തങ്ങളുടെ പ്രതിഷേധത്തിന്റെ വീഡിയോ ചിത്രീകരിക്കാന് പാടില്ലെന്നും പറഞ്ഞായിരുന്നു സ്ത്രീകള് അടക്കമുള്ളവര് ആക്രമണം അഴിച്ചുവിട്ടത്.
ഏഷ്യാനെറ്റ്, മീഡിയ വണ് ചാനലുകളുടെ ക്യാമറകള് തകര്ത്തു. കൈരളി, ഏഷ്യാനെറ്റ്, മീഡിയ വണ്, ജനം, റിപ്പബ്ലിക് ടി വി ചാനലുകളുടെ റിപ്പോര്ട്ടര്മാരെയും ക്യാമറമാന്മാരെയും കയ്യേറ്റം ചെയ്യാനും ഭീഷണിപ്പെടുത്താനും ശ്രമിച്ചു. 24 ന്യൂസിന്റെ ഡ്രൈവര്ക്ക് കല്ലേറില് തലയ്ക്കു പരിക്കേറ്റു. വൈദികര് അടക്കമുള്ളവര് വനിത മാധ്യമ പ്രവര്ത്തകരോട് അസഭ്യവര്ഷത്തോടെയാണ് സംസാരിച്ചത്. ഇത്തരം അക്രമങ്ങള് ഒരു തരത്തിലും അംഗീകരിക്കാന് കഴിയില്ല. ഉച്ചവരെ ലൈവ് റിപ്പോര്ട്ടിംഗ് നടത്തിയ ചാനലുകാര്ക്ക് പിന്നീട് മടങ്ങിപ്പോരേണ്ട സാഹചര്യമാണ് ഉണ്ടായത്. സംഭവത്തില് കേരള പത്ര പ്രവര്ത്തക യൂണിയന് തിരുവനന്തപുരം ജില്ലാ കമ്മിറ്റി ശക്തമായി പ്രതിഷേധിച്ചു.
ലത്തീന് അതിരൂപതയുടെ നേതൃത്വത്തില് വന് പ്രതിഷേധമാണ് വിഴിഞ്ഞം പദ്ധതി പ്രദേശത്ത് നടക്കുന്നത്. കടലിലൂടെ വള്ളങ്ങളിലെത്തിയ മത്സ്യത്തൊഴിലാളികള് പ്രതിഷേധ സൂചകമായി വള്ളങ്ങള് കത്തിച്ചു. പ്രതിഷേധത്തിന്റെ നൂറാം ദിവസമായ ഇന്ന് കരയിലും കടലിലും ഒരേ സമയത്താണ് സമരം സംഘടിപ്പിച്ചത്.
മുല്ലൂര് കവാടം, വിഴിഞ്ഞം കവാടം, മുതലപ്പൊഴി എന്നിവിടങ്ങളിലാണ് പ്രതിഷേധം സംഘടിപ്പിച്ചത്. മുല്ലൂരിലെ പ്രധാന കവാടത്തിന്റെ പൂട്ട് തകര്ത്ത സമരക്കാര് പദ്ധതി പ്രദേശത്തേയ്ക്ക് കടക്കുകയായിരുന്നു. രാവിലെ 8.30 മുതല് ഒരോ ഇടവകകളില് നിന്നും ബൈക്കുകളിലും ഒട്ടോകളിലുമാണ് പ്രതിഷേധക്കാര് മുല്ലൂരിലെ സമരപന്തലിലെത്തിയത്.
