തിരുവനന്തപുരം: മ്യൂസിയം വളപ്പില്‍ പ്രഭാതസവാരിക്കെത്തിയ വനിതാ ഡോക്ടര്‍ക്കുനേരെ ലൈംഗികാതിക്രമം നടത്തിയ പ്രതിയെ തിരിച്ചറിഞ്ഞു. കുറവന്‍കോണത്ത് വീട്ടില്‍ അതിക്രമിച്ചു കയറിയ കേസില്‍ അറസ്റ്റിലായ മലയിന്‍കീഴ് സ്വദേശി സന്തോഷ് (40) തന്നെയാണ് ഈ കേസിലെയും പ്രതി. പരാതിക്കാരി പ്രതിയെ തിരിച്ചറിഞ്ഞു.
പേരൂര്‍ക്കട പോലീസ് സ്റ്റേഷനില്‍ നടന്ന തിരിച്ചറിയല്‍ പരേഡിലാണ് സന്തോഷിനെ പരാതിക്കാരി തിരിച്ചറിഞ്ഞത്. മ്യൂസിയം കേസില്‍ സന്തോഷിന്റെ അറസ്റ്റ് ഉടന്‍ രേഖപ്പെടുത്തും. കുറവന്‍കോണത്ത് വീട്ടില്‍ അതിക്രമിച്ച് കയറിയ സംഭവത്തില്‍ ജലവിഭവ വകുപ്പ് മന്ത്രി റോഷി അഗസ്റ്റിന്റെ പിഎസിന്റെ ഡ്രൈവറായ സന്തോഷിനെ ചൊവ്വാഴ്ച രാത്രിയില്‍ പോലീസ് അറസ്റ്റ് ചെയ്തിരുന്നു.
വനിതാ ഡോക്ടറെ ഉപദ്രവിച്ച കേസിലും ഇയാളുടെ പങ്ക് സംശയിച്ചതിനാല്‍ പോലീസ് തിരിച്ചറിയല്‍ പരേഡ് നടത്തുകയായിരുന്നു. അറസ്റ്റിലായതിന് പിന്നാലെ ഇയാളെ പുറത്താക്കാന്‍ മന്ത്രി നിര്‍ദേശം നല്‍കി. കുറവന്‍കോണത്ത് പ്രതി വീട്ടില്‍ കയറിയതിന് മണിക്കൂറുകള്‍ക്ക് പിന്നാലെയാണ് മ്യൂസിയം പരിസരത്ത് വനിതാ ഡോക്ടര്‍ക്ക് നേരെ അതിക്രമം ഉണ്ടായത്.
ജലഅതോറിറ്റിയുടെ ഇന്നോവ കാറിലാണ് സംഭവ ദിവസം സന്തോഷ് സഞ്ചരിച്ചത്. ഇന്നോവ വാഹനം കവടിയാര്‍ പരിസരത്ത് പാര്‍ക്ക് ചെയ്ത ശേഷം കുറവന്‍കോണത്തെ വീട്ടിലേക്ക് അതിക്രമിച്ചു കയറുന്ന സിസിടിവി ദൃശ്യം പോലീസിന് ലഭിച്ചിരുന്നു. വനിതാ ഡോക്ടര്‍ക്കെതിരെ അതിക്രമം നടത്തിയ സമയത്തും ഈ കാര്‍ മ്യൂസിയം പരിധിയിലുള്ളതായി പോലീസ് കണ്ടെത്തിയിരുന്നു.
Discussion about this post