തിരുവനന്തപുരം: പാറശാല ഷാരോണ് വധക്കേസില് പൊലീസ് ഭീഷണിപ്പെടുത്തി കുറ്റം സമ്മതിപ്പിച്ചതാണെന്ന് ഒന്നാം പ്രതി ഗ്രീഷ്മ. അമ്മയേയും അമ്മാവനെയും പ്രതികളാക്കുമെന്ന് പൊലീസ് ഭീഷണിപ്പെടുത്തിയെന്നും തനിക്കെതിരെയുള്ള തെളിവുകള് കൃത്രിമമായി ഉണ്ടാക്കിയതാണെന്നും പ്രതി നെയ്യാറ്റിന്കര മജിസ്ട്രേറ്റ് കോടതിയോട് പറഞ്ഞു.
റിമാന്ഡ് കാലാവധി അവസാനിച്ചതിനെത്തുടര്ന്ന് അട്ടക്കുളങ്ങര വനിതാ ജയിലില് നിന്ന് വീഡിയോ കോണ്ഫറന്സിലൂടെയാണ് പ്രതിയെ ഹാജരാക്കിയത്. പ്രതിയെ നേരിട്ട് കോടതിയില് ഹാജരാക്കണമെന്ന് കോടതി നിര്ദേശിച്ചു. ഷാരോണിനെ തന്റെ ജീവിതത്തില് നിന്ന് ഒഴിവാക്കാന് വേണ്ടി കഷായത്തില് വിഷം ചേര്ത്ത് കൊലപ്പെടുത്തിയതാണെന്നായിരുന്നു പ്രതി പൊലീസിന് നല്കിയ മൊഴി.
അതേസമയം, പ്രതി മൊഴി മാറ്റിയത് അന്വേഷണത്തെ ബാധിക്കില്ലെന്ന് പൊലീസ് അറിയിച്ചു. ശാസ്ത്രീയമായ തെളിവുകള് ശേഖരിച്ചിട്ടുണ്ടെന്നും ഗ്രീഷ്മയുടെ കുറ്റസമ്മത മൊഴി വീഡിയോയില് രേഖപ്പെടുത്തിയിട്ടുണ്ടെന്നും അന്വേഷണ ഉദ്യോഗസ്ഥര് അറിയിച്ചു. കഴിഞ്ഞ ഒക്ടോബര് 14നാണ് ഗ്രീഷ്മ നല്കിയ കഷായം ഷാരോണ് കുടിച്ചത്. തുടര്ന്ന് അസ്വസ്ഥത അനുഭവപ്പെട്ട യുവാവ്, ചികിത്സയിലിരിക്കെ ഒക്ടോബര് 25നാണ് മരിച്ചത്.
Discussion about this post