ന്യൂഡല്ഹി: ക്ഷേത്രഭരണ കാര്യത്തില് സര്ക്കാര് എന്തിനാണ് ഇടപെടുന്നതെന്ന് ചോദ്യവുമായി സുപ്രീംകോടതി. വിശ്വാസവുമായി ബന്ധപ്പെട്ട കാര്യങ്ങള് വിശ്വാസികള്ക്ക് നല്കിക്കൂടേയെന്നും ക്ഷേത്രഭരണം വിശ്വാസികള് നടത്തട്ടെയെന്നും ജസ്റ്റിസ് എസ്.കെ കൗള്, എ.എസ് ഓക എന്നിവരുടെ ബെഞ്ച് ചോദിച്ചു.
ആന്ധ്രയിലെ അഹോബിലം നരസിംഹസ്വാമി ക്ഷേത്ര ഭരണത്തിന് എക്സിക്യൂട്ടീവ് ഓഫീസറെ നിയമിച്ച ആന്ധ്രാപ്രദേശ് സര്ക്കാര് നടപടിയെ തളളിയ ഹൈക്കോടതി ഉത്തരവിനെതിരെ സര്ക്കാര് സമര്പ്പിച്ച ഹര്ജി തളളിക്കളഞ്ഞാണ് കോടതി ഇത്തരത്തില് അഭിപ്രായപ്പെട്ടത്. സര്ക്കാര് എന്തിനാണ് ക്ഷേത്രഭരണത്തില് ഇടപെടുന്നതെന്ന് സുപ്രീംകോടതി ചോദിച്ചു.
അഹോബിലം നരസിംഹക്ഷേത്രത്തിന്റെ ഭരണം അഹോബിലം മഠത്തിനാണ്. മഠം തമിഴ്നാട്ടിലായതിനാല് ക്ഷേത്രഭരണത്തിനുളള അവകാശം നഷ്ടമാകില്ലെന്ന് ഹൈക്കോടതി വിധിച്ചിരുന്നു. ‘നിങ്ങള് ഇക്കാര്യത്തില് ഇടപെടുന്നത് എന്തിന്?’ ആന്ധ്രാ സര്ക്കാരിനായി ഹാജരായ അഭിഭാഷകനോട് ജസ്റ്റിസ് കൗള് ചോദിച്ചു. ‘ക്ഷേത്ര കാര്യങ്ങള് വിശ്വാസികള് തീരുമാനിക്കട്ടെ. ക്ഷേത്രങ്ങളടക്കം എന്തുകൊണ്ട് വിശ്വാസികള്ക്ക് വിട്ടുനല്കിക്കൂടാ’ അദ്ദേഹം വാദത്തിനിടെ പറഞ്ഞു. ചരിത്ര പുസ്തകങ്ങളും രേഖകളും ആധാരമാക്കിയാണ് ആന്ധ്രാ ഹൈക്കോടതി നേരത്തെ സംസ്ഥാന സര്ക്കാരിന്റെ വാദം തളളിയത്.
കേസില് സര്ക്കാരിനായി മുതിര്ന്ന അഭിഭാഷകന് നിരഞ്ജന് റെഡ്ഡിയാണ് സുപ്രീംകോടതിയില് ഹാജരായത്. മഠത്തിനുവേണ്ടി കേസ് വാദിച്ചത് മുതിര്ന്ന അഭിഭാഷകരായ സതീഷ് പ്രസാരണ്, സി.ശശിധരന്, പി.ബി സുരേഷ്, വിപിന് നായര് എന്നിവരാണ്.
Discussion about this post