കൊച്ചി: പിഎഫ്ഐയുമായി ബന്ധമില്ലാത്തവരുടെ പേരില് എടുത്ത ജപ്തി നടപടികള് പിന്വലിക്കാന് ഹൈക്കോടതി ഉത്തരവ്. മലപ്പുറത്തെ ടിപി യൂസഫ് അടക്കം 18 പേര്ക്കെതിരായ നടപടി പിന്വലിക്കാനാണ് നിര്ദ്ദേശം. ജപ്തി നടപ്പാക്കിയതില് വീഴ്ച പറ്റിയെന്നും ഇത് ബോധമായതോടെ നടപടികള് നിര്ത്തി വെച്ചതായി സര്ക്കാര് കോടതിയെ അറിയിച്ചു.
മിന്നല് ഹര്ത്താലില് 5.20 ലക്ഷം രൂപയുടെ പൊതു മുതല് നഷ്ടം ഈടാക്കാനാണ് പിഎഫഐ ഭാരവാഹികളുടെ ആസ്തി വകകള് കണ്ട് കെട്ടാന് ഹൈക്കോടതി നിര്ദ്ദേശിച്ചത്. ഹൈക്കോടതി കര്ശന നിര്ദ്ദേശം നല്കിയതോടെ ഒറ്റദിവസം കൊണ്ട് സര്ക്കാര് വ്യാപകമായി നടപടിയെടുത്തു. ഇതിലാണ് വ്യാപക പരാതിയും ഉയര്ന്നത്. ഇന്ന് ഹൈക്കോടതിയില് നല്കിയ റിപ്പോര്ട്ടില് പിഴവ് പറ്റിയെന്ന് സര്ക്കാരും സമ്മതിച്ചു. ജനുവരി 18ന് അടിയന്തര നടപടിയ്ക്ക് ഹൈ്കകോടതി നിര്ദ്ദേശിച്ചതിനാല് വേഗത്തില് ഇത് പൂര്ത്തിയാക്കി.
റജിസ്ട്രേഷന് ഐജിയില് നിന്നും ലഭിച്ച വിവരങ്ങളുടെ അടിസ്ഥാനത്തിലാണ് ലാന്ഡ് റവന്യു കമ്മീഷണര് നടപടികള് ആരംഭിച്ചത്. ചുരുങ്ങിയ സമയത്തിനുള്ളില് നടപടികള് പൂര്ത്തിയാക്കി. ഇതിനിടയിലാണ് പേര്, വിലാസം, സര്വ്വേ നമ്പര് അടക്കമുള്ളവയിലെ സാമ്യം കാരണം ചില പിഴവ് സംഭവിച്ചത്. പിഎഫ്ഐയുമായി ബന്ധമില്ലാത്തവരുടെ സ്വത്ത് കണ്ട് കെട്ടി. തുടര്ന്ന് നടപടികള് നിര്ത്തി വെക്കാന് ലാന്ഡ് റവന്യു കമ്മീഷണര്ക്കും പോലീസ് മേധാവിയ്ക്കും നിര്ദ്ദേശം നല്കിയെന്നും സര്ക്കാര് അറിയിച്ചു.
എന്നാല് തെറ്റായ നടപടികള് പിന്വലിക്കണമെന്ന് കേസില് കക്ഷി ചേരാനെത്തിയ മലപ്പുറത്തെ യൂസഫ് അടക്കമുള്ളവര് കോടതിയെ അറിയിച്ചു. ഇതിന് പിന്നാലെയാണ് 18 പേരെ പട്ടികയില് നിന്ന് നീക്കാന് ഹൈക്കോടതി നിര്ദ്ദേശം നല്കിയത്. തെറ്റായി പട്ടികയില് വന്നവരുടെ വിശദാംശം അറിയിക്കാനും കോടതി നിര്ദ്ദേശം നല്കി. ഇതിനിടെ റസ്റ്റ് ഹൗസിലൊരുക്കിയ താല്ക്കാലിക സൗകര്യങ്ങളില് ക്ലെയിം കമ്മീഷണര് അതൃപ്തി അറിയിച്ചു. ഒരു മാസത്തിനകം പ്രശ്നം പരിഹരിക്കുമെന്ന് ജില്ലാ കളക്ര് കോടതിയെ അറിയിച്ചു. കേസ് ഈമാസം 20 ന് വീണ്ടും പരിഗണിക്കും.
Discussion about this post