തിരുവനന്തപുരം: സാധാരണക്കാര്‍ക്ക് ഇരുട്ടടിയായി രണ്ടാം പിണറായി സര്‍ക്കാരിന്റെ രണ്ടാം പൂര്‍ണ ബഡ്ജറ്റ്. പെട്രോളും ഡീസലും മദ്യവും അടക്കമുള്ളവയുടെ വില കുത്തനെ ഉയര്‍ത്തി. പെട്രോളിനും ഡീസലിനും ലിറ്ററിന് രണ്ട് രൂപയാണ് സെസ് ഏര്‍പ്പെടുത്തുന്നത്.
സാമൂഹ്യ സുരക്ഷാ ഫണ്ടിനായി മദ്യത്തിന് സെസ് പിരിക്കുമെന്ന് മന്ത്രി അറിയിച്ചു. അടുത്തിടെയാണ് മദ്യവില വര്‍ദ്ധിപ്പിച്ചത്. ആയിരം രൂപയ്ക്ക് മുകളിലുള്ള മദ്യത്തിന് 40 രൂപയാണ് സെസ്. ആയിരം രൂപവരെയുള്ള മദ്യത്തിന് 20 രൂപയും സെസ് ഏര്‍പ്പെടുത്തും. ഇതുവഴി നാനൂറ് കോടിയോളം രൂപയുടെ അധിക വരുമാനം ഉണ്ടാകുമെന്നാണ് സര്‍ക്കാരിന്റെ കണക്കുകൂട്ടല്‍.
ഭൂമി ന്യായവില, രജിസ്ട്രേഷന്‍ നികുതി കൂട്ടി
ഭൂമിയുടെ ന്യായവിലയും 20 ശതമാനം കൂട്ടി. കെട്ടിട പെര്‍മിറ്റ് ഫീസും, കെട്ടിട അനുമതി ഫീസും കൂട്ടി. കൂടാതെ ഒഴിഞ്ഞുകിടക്കുന്ന കെട്ടിടങ്ങള്‍ക്ക് പ്രത്യേക നികുതി ഏര്‍പ്പെടുത്തും. ഒന്നിലധികം വീടുകളുള്ളവര്‍ക്കും പ്രത്യേക നികുതി ഏര്‍പ്പെടുത്തും.
വാഹനങ്ങളുടെ ഒറ്റത്തവണ നികുതി കൂട്ടി
കാര്‍ അടക്കമുള്ള വാഹനങ്ങളുടെ ഒറ്റത്തവണ നികുതി കൂട്ടി. മോട്ടോര്‍ വാഹന നികുതിയും സെസും വര്‍ദ്ധിപ്പിച്ചു. മോട്ടോര്‍ സൈക്കിളുകള്‍ക്ക് ഒറ്റത്തവണ നികുതി രണ്ട് ശതമാനമാണ് വര്‍ദ്ധിപ്പിച്ചത്.
ജുഡീഷ്യല്‍ കോടതി ഫീസുകളും കുത്തനെ കൂട്ടി. വാണിജ്യ, വ്യവസായ ആവശ്യത്തിനുള്ള വൈദ്യുതി തീരുവയും കൂട്ടി. സാമൂഹിക ക്ഷേമ പെന്‍ഷന്‍ കൂട്ടുമെന്ന് പ്രതീക്ഷിച്ചെങ്കിലും അതുണ്ടായില്ല. ഇതും ബഡ്ജറ്റിനെതിരെ പ്രതിഷേധമുണ്ടാകാന്‍ കാരണമാകും. സര്‍ക്കാര്‍ സംവിധാനങ്ങള്‍ക്ക് മാത്രമാണ് ഫണ്ട് പ്രഖ്യാപിച്ചിരിക്കുന്നതെന്നും ശ്രദ്ധേയമാണ്.
കെ ഫോണിന് 100കോടി രൂപയും, സ്റ്റാര്‍ട്ട് അപ്പ് മിഷന് 90.5 കോടി രൂപയുമാണ് വകയിരുത്തിയിരിക്കുന്നത്. കാരുണ്യ ആരോഗ്യ സുരക്ഷ പദ്ധതിക്കായി 574.5 കോടി രൂപ പ്രഖ്യാപിച്ചിട്ടുണ്ട്.
Discussion about this post