കൊച്ചി: മാനേജ്മെന്റ് നടപ്പിലാക്കുന്ന പദ്ധതികളെല്ലാം യൂണിയനുകളും ഒരുകൂട്ടം തൊഴിലാളികളും ചേര്‍ന്ന് അട്ടിമറിക്കുകയാണെന്ന് ഹൈക്കോടതിയില്‍ കെഎസ്ആര്‍ടിസി മാനേജ്മെന്റ്. 2022 ജനുവരിയ്ക്ക് ശേഷം വിരമിച്ചവര്‍ക്ക് പെന്‍ഷന്‍ ആനുകൂല്യം നല്‍കാത്തതിന് എതിരെ സമര്‍പ്പിച്ച ഹര്‍ജിയിലാണ് കെഎസ്ആര്‍ടിസി മാനേജ്മെന്റ് പ്രതിസന്ധിയെ കുറിച്ച് വ്യക്തമാക്കിയത്. പുതിയ പദ്ധതികളെയും എതിര്‍ക്കുന്നത് കെഎസ്ആര്‍ടിസിയില്‍ പൊതുരീതിയായി മാറി.
978 പേരാണ് 2022 ജനുവരിയ്ക്ക് ശേഷം കെഎസ്ആര്‍ടിസിയില്‍ വിരമിച്ചത്. ഇവര്‍ക്ക് ആനുകൂല്യങ്ങള്‍ നല്‍കാന്‍ കഴിഞ്ഞിട്ടില്ല. 23 പേര്‍ക്ക് മാത്രമാണ് ആനുകൂല്യങ്ങള്‍ നല്‍കാനായതെന്നും മറ്റുള്ളവര്‍ക്ക് നല്‍കുന്നതിന് രണ്ട് വര്‍ഷത്തെ സാവകാശം വേണമെന്നുമാണ് കെഎസ്ആര്‍ടിസി കോടതിയില്‍ ആവശ്യപ്പെടുന്നത്.
ധനസഹായത്തിന് സര്‍ക്കാരിനോട് ആവശ്യപ്പെട്ടിട്ടുണ്ട്. 50 കോടി രൂപയാണ് ഇതിനായി വേണ്ടത്. ഇത് ലഭിക്കുന്ന മുറയ്ക്ക് പെന്‍ഷന്‍ ആനുകൂല്യങ്ങള്‍ നല്‍കുമെന്നും ഒരുമാസവും ഇതുവരെ പെന്‍ഷന്‍ മുടക്കിയിട്ടില്ലെന്നുമാണ് കെഎസ്ആര്‍ടിസി കോടതിയെ അറിയിച്ചത്.
ഇപ്പോള്‍ രൂക്ഷമായ സാമ്പത്തിക പ്രതിസന്ധിയുണ്ടെന്നും വരുമാനത്തില്‍ നിന്നും ശമ്പളം പോലും ജീവനക്കാര്‍ക്ക് നല്‍കാനാകാത്ത ബുദ്ധിമുട്ടുണ്ടെന്നുമാണ് കോടതിയെ സത്യവാങ്മൂലത്തില്‍ കെഎസ്ആര്‍ടിസി അറിയിച്ചത്.
Discussion about this post