തിരുവനന്തപുരം: വെള്ളനാട്ട് കിണറ്റില്‍ വീണ കരടി ചത്തു. കിണറ്റില്‍ നിന്നും പുറത്തെടുത്ത കരടിക്ക് ജീവനില്ലെന്ന് വെറ്റനറി ഡോക്ടര്‍മാര്‍ അറിയിച്ചു. രാവിലെ കരടിയെ മയക്കുവെടി വെച്ചിരുന്നു. ഇതിനു പിന്നാലെ കരടി വെള്ളത്തില്‍ താണു. വെള്ളത്തില്‍ മുങ്ങിക്കിടന്ന കരടിയെ ഒന്നരമണിക്കൂറിനുശേഷമാണ് പുറത്തെടുക്കാനായത്.ബുധനാഴ്ച രാത്രി പന്ത്രണ്ടോടെയാണ് കരടി വെള്ളനാട് സ്വദേശി അരവിന്ദന്റെ വീട്ടിലെ കിണറ്റില്‍ വീണത്. കോഴിയെ പിടിക്കാന്‍ ശ്രമിക്കുന്നതിനിടെയിലാണ് കരടി വീണത്. വെളുപ്പിന് മൂന്നിന് വനംവകുപ്പ് ഉദ്യോഗസ്ഥര്‍ സ്ഥലത്തെത്തിയെങ്കിലും പുലര്‍ച്ചയോടെയാണ് രക്ഷാപ്രവര്‍ത്തനം തുടങ്ങാനായത്.
വെള്ളത്തില്‍ വച്ച് തന്നെ മയക്കുവെടി വച്ചതാണ് കരടി മുങ്ങിപ്പോകാന്‍ കാരണമെന്നുള്ള ആരോപണം ശക്തമായിട്ടുണ്ട്. അതേസമയം കിണറ്റില്‍ കരടി വീണതിനെ തുടര്‍ന്ന് ഭീതിയിലാണ് നാട്ടുകാര്‍. കരടി എവിടെ നിന്നും വന്നുവെന്ന് ആര്‍ക്കും അറിയില്ല. വനത്തില്‍ നിന്നും അകലെയാണ് ഈ ഗ്രാമം.
