കേരളത്തിലോടുന്ന ട്രെയിനുകളില്‍ എസി കോച്ചുകളുടെ എണ്ണം കൂട്ടാനൊരുങ്ങി ദക്ഷിണ റെയില്‍വേ

തിരുവനന്തപുരം: കേരളത്തിലോടുന്ന ട്രെയിനുകളില്‍ സെപ്റ്റംബര്‍ മാസത്തോടെ ഓരോ സ്ലീപ്പര്‍ കോച്ച് ഒഴിവാക്കി പകരം ഓരോ എസി ത്രീ ടയര്‍ കോച്ച് ഘടിപ്പിക്കാന്‍ ദക്ഷിണ റെയില്‍വേ തീരുമാനിച്ചു. മംഗളൂരു-തിരുവനന്തപുരം മലബാര്‍ എക്‌സ്പ്രസ് (16629/30), മംഗളൂരു-തിരുവനന്തപുരം മാവേലി എക്‌സ്പ്രസ് (16603/604), മംഗളൂരു-ചെന്നൈ മെയില്‍ (12601/02), മംഗളൂരു-ചെന്നൈ വെസ്റ്റ്കോസ്റ്റ് എക്‌സ്പ്രസ് (22637/38) എന്നീ തീവണ്ടികളിലാണ് ആദ്യം നടപ്പിലാക്കുന്നത്.

മാവേലിയില്‍ സെപ്റ്റംബര്‍ 11നും മെംഗളൂര്‍ മെയിലില്‍ 13നും വെസ്റ്റ് കോസ്റ്റില്‍ 14നും മലബാറില്‍ 17നും പ്രാബല്യത്തില്‍ വരും. ഇതോടെ ഈ ട്രെയിനുകളില്‍ ഒരു എസി ഫസ്റ്റ്ക്ലാസ് കം ടു ടയര്‍ കോച്ചും രണ്ട് ടു ടയര്‍ എസി കോച്ചും അഞ്ച് ത്രീ ടയര്‍ എസി കോച്ചുമുണ്ടാകും. സ്ലീപ്പര്‍ കോച്ചുകളുടെ എണ്ണം ഒമ്പതായി കുറയും. ജനറല്‍ കോച്ചുകളുടെ എണ്ണം അഞ്ചായും ഭിന്നശേഷിസൗഹൃദ കോച്ചുകളുടെ എണ്ണം രണ്ടായും തുടരും. തിരുവനന്തപുരം-മംഗളൂരു എക്‌സ്പ്രസില്‍ (16347/48) ജൂലായ് 25 മുതല്‍ ഒരു ജനറല്‍കോച്ച് കുറച്ച് എ സി കോച്ച് കൂട്ടുവാന്‍ നേരത്തേ ധാരണയായിരുന്നു.

എല്ലാ ട്രെയിനുകളിലും ഘട്ടംഘട്ടമായി സ്ലീപ്പര്‍ കോച്ചിന്റെയും ജനറല്‍ കോച്ചിന്റെയും എണ്ണം കുറച്ച് എസി കോച്ചുകളുടെ എണ്ണം കൂട്ടുന്നതാണ് റെയില്‍വേ ഇറക്കുന്ന പുതിയ നയം. യാത്രക്കാര്‍ക്ക് എസി കോച്ചുകളോടാണ് താല്പര്യം കണക്കിലെടുത്താണ് പുതിയ നീക്കം.