തിരുവനന്തപുരം/തൃശൂര്‍: സംസ്ഥാനത്ത് ആശങ്കയിലാക്കി പനിബാധ. തൃശൂര്‍ ജില്ലയിലെ ചാഴൂരില്‍ ചികിത്സയിലായിരുന്ന എട്ടാം ക്‌ളാസ് വിദ്യാര്‍ത്ഥി ധനിഷ്‌ക്(13) പനി ബാധിച്ച് മരിച്ചു. ചാഴൂര്‍ എസ്.എന്‍.എം.എച്ച് എസിലെ എട്ടാം ക്‌ളാസ് വിദ്യാര്‍ത്ഥിയാണ് ധനിഷ്‌ക്. കുട്ടിയെ ബാധിച്ചത് ഡെങ്കിപനിയാണെന്നാണ് സംശയം. ഇക്കാര്യത്തില്‍ സ്ഥിരീകരണം വന്നിട്ടില്ല. അതേസമയം തിരുവനന്തപുരത്ത് ഡെങ്കിപ്പനി ബാധിച്ച് കാട്ടാക്കട സ്വദേശിയായ വിജയന്‍ മരിച്ചു. സംസ്ഥാനത്ത് ദിവസവും 12,000ത്തോളം പേരാണ് പനി ബാധിച്ച് ചികിത്സ തേടുന്നതെന്നാണ് വിവരം. ഏറ്റവുമധികം പേര്‍ ചികിത്സ തേടിയത് മലപ്പുറം ജില്ലയിലാണ്. എന്നാല്‍ തലസ്ഥാനത്തും എറണാകുളം, കോഴിക്കോട് ജില്ലകളിലും പ്രതിദിനം ആയിരത്തിലധികം പേര്‍ക്ക് രോഗം സ്ഥിരീകരിക്കുന്നുണ്ട്.
അന്‍പത് വയസില്‍ താഴെയുള്ളവരാണ് മരിച്ച മിക്കവരും. കൊല്ലത്ത് അഞ്ചാംക്‌ളാസ് വിദ്യാര്‍ത്ഥി അഭിജിത്തും മലപ്പുറത്ത് 13കാരനായ ഗോകുല്‍ എന്ന വിദ്യാര്‍ത്ഥിയും പനി ബാധിച്ച് മരിച്ചിരുന്നു. 10 ദിവസത്തിനിടെ 11,462 പേര്‍ക്കാണ് ഡെങ്കി സ്ഥിരീകരിച്ചത്. ആകെ പനിബാധിതര്‍ 1.12 ലക്ഷം പേരും.
Discussion about this post