അഞ്ചു വര്‍ഷത്തിനിടെ കാണാതായ 60 കുട്ടികള്‍ എവിടെ? ജവഹര്‍ ബാല്‍ മഞ്ച്

തിരുവനന്തപുരം: സംസ്ഥാനത്ത് നിന്നും കഴിഞ്ഞ അഞ്ചു വര്‍ഷത്തിനിടെ കാണാതായ 60 കുട്ടികള്‍ എവിടെയെന്ന് കണ്ടെത്താന്‍ ഇനിയും കഴിഞ്ഞിട്ടില്ലെന്ന റിപ്പോര്‍ട്ട് ഞെട്ടിക്കുന്നതാണെന്ന് ജവഹര്‍ ബാല്‍ മഞ്ച് സംസ്ഥാന കോര്‍ഡിനേറ്റര്‍ ആനന്ദ് കണ്ണശ. ഇതില്‍ ആറ് കേസുകള്‍ ഇതുവരെ കണ്ടെത്താന്‍ കഴിയാത്ത കേസുകളായി പരിഗണിച്ച് അന്വേഷണം അവസാനിപ്പിക്കാന്‍ അനുവദിക്കണം എന്ന് പൊലീസ് കോടതിയില്‍ റിപ്പോര്‍ട്ട് നല്‍കി എന്നുമാണ് പുറത്തുവരുന്ന റിപ്പോര്‍ട്ടുകള്‍. ഒന്നോ രണ്ടോ അല്ല, 60 കുട്ടികളെയാണ് കേരള പൊലീസിന് എവിടെയെന്ന് കണ്ടെത്താന്‍ കഴിയില്ലെന്ന അവസ്ഥയിലുള്ളത്. ഈ നാട്ടിലെ കുട്ടികള്‍ക്ക് എന്ത് സംഭവിച്ചു എന്ന ചോദ്യത്തിനൊപ്പം, ഈ നാട്ടിലെ പൊലീസിന് എന്ത് സംഭവിച്ചു എന്ന ചോദ്യവും ഉയരുന്ന സാഹചര്യമാണെന്നും അദ്ദേഹം ചൂണ്ടിക്കാട്ടി.

ഒന്നോ രണ്ടോ കുട്ടികളെ കാണാതായാല്‍, അവരെ കണ്ടെത്താന്‍ സാധിക്കാതെ വന്നാല്‍, അതിനെ വേണമെങ്കില്‍ ന്യായീകരിക്കാം. എന്നാല്‍, കേരളത്തിലെ ആ 60 കുട്ടികള്‍ക്ക് എന്തുപറ്റി ? അവര്‍ എങ്ങോട്ട് പോയി ? അവര്‍ ഇപ്പോഴും ജീവനോടെയുണ്ടോ ? ഉണ്ടെങ്കില്‍ അവര്‍ എന്ത് ചെയ്യുന്നു ? തുടങ്ങിയ അനേകം ചോദ്യങ്ങള്‍ക്ക് ഉത്തരം നല്‍കേണ്ടത് ഇവിടുത്തെ ഭരണകൂടമാണെന്നും ആനന്ദ് കണ്ണശ പറഞ്ഞു.

ഇരുപത്തഞ്ച് വര്‍ഷം മുമ്പുള്ള സാമൂഹിക അന്തരീക്ഷമല്ല ഇന്ന് കേരളത്തിലുള്ളത്. ഒരു കുട്ടിയെ കാണാതായാല്‍ നിമിഷങ്ങള്‍ക്കുള്ളില്‍ കണ്ടെത്താന്‍ കഴിയുന്ന ശേഷിയുള്ള പൊലീസ് സംവിധാനം. ദിനംപ്രതി അത്തരം സംഭവങ്ങള്‍ കേരളത്തില്‍ നടക്കുന്നുമുണ്ട്. കാണാതായി മണിക്കൂറുകള്‍ക്കുള്ളില്‍ കുട്ടികളെ കണ്ടെത്തുന്ന അന്വേഷണ വിദഗ്ധരായ പൊലീസ് സേനയാണ് ഇവിടെയുള്ളത്. 27 വര്‍ഷം ഒളിവില്‍ കൊലക്കേസ് പ്രതിയായ സ്ത്രീയെ പോലും കേരള പൊലീസ് സമീപ ദിവസങ്ങളില്‍ കണ്ടെത്തിയിരുന്നു. അത്രയും കാര്യശേഷിയുള്ള ഒരു സേനയുടെ കണ്ണുവെട്ടിച്ച് 60 കുട്ടികള്‍ അപ്രത്യക്ഷരായി എന്നതാണ് ഈ സംഭവത്തിന്റെ ഗൗരവം വര്‍ദ്ധിപ്പിക്കുന്നത്.

ഈ 60 കുട്ടികളുമായി ബന്ധപ്പെട്ട് ചോദ്യങ്ങള്‍ അനവധിയാണ്. ഇവരെ ആരാണ് കടത്തിക്കൊണ്ടുപോയത് ? അവയവകൈമാറ്റ മാഫിയായോ ? അതോ ഭിക്ഷാടന മാഫിയയോ ? അതുമല്ലെങ്കില്‍ തീവ്രവാദ സംഘങ്ങളോ ? ഇനി ഇവര്‍ ലഹരിസംഘങ്ങളുടെ പിടിയിലായോ? അന്താരാഷ്ട്ര ബന്ധമുള്ള സെക്‌സ് റാക്കറ്റുകളാകുമോ ഈ കുട്ടികളുടെ തിരോധാനത്തിന് പിന്നില്‍ ? കേരള പൊലീസിന്റെ കാഴ്ച്ചകളെ മറയ്ക്കും വിധം ശക്തരായ ആരുടെ കൈകളിലാണ് ഈ കുട്ടികള്‍ പെട്ടിരിക്കുന്നത് എന്നതിന്റെ ഉത്തരം കണ്ടെത്തുക തന്നെ വേണം.

കഴിഞ്ഞ അഞ്ചു വര്‍ഷത്തിനിടെയാണ് 60 കുട്ടികളെ കാണാതായിരിക്കുന്നത്. 48 ആണ്‍കുട്ടികളും 12 പെണ്‍കുട്ടികളും. കഴിഞ്ഞ വര്‍ഷമാണ് ഏറ്റവുമധികം കുട്ടികളെ സംസ്ഥാനത്ത് നിന്നും കാണാതായിരിക്കുന്നത്. 28 കുട്ടികളെയാണ് ഇക്കഴിഞ്ഞ ഒരു വര്‍ഷത്തിനിടെ കാണാതായത്. ഇതില്‍ 10 കുട്ടികള്‍ മലപ്പുറത്ത് നിന്നാണ് കാണാതായിരിക്കുന്നത്.

എന്തുകൊണ്ടാണ് കുട്ടികളെ കാണാതാകുന്ന സംഭവങ്ങളില്‍ അന്വേഷണം ഇത്ര നിര്‍ജ്ജീവമാകുകയോ അലസമാകുകയോ ചെയ്യുന്നത്. കേരളത്തിലെ സാമൂഹിക ക്രമത്തില്‍ ഓരോ കേസിന്റെയും മുന്‍ഗണന തീരുമാനിക്കുന്നത് മൂന്ന് ഘടകങ്ങളാണ്. കുടുംബത്തിന്റെ സാമൂഹിക പശ്ചാത്തലമാണ് ആദ്യത്തേത്. സാമ്പത്തിക സ്വാധീനം രണ്ടാമത്തേതും വിദ്യാഭ്യാസം മൂന്നാമത്തേയും ഘടകമാണ്. പരാതിക്കാരന് മത – സാമുദായിക-രാഷ്ട്രീയ സ്വാധീനമുണ്ടെങ്കില്‍ ആ കേസുകള്‍ മുന്‍ഗണനാ ക്രമത്തില്‍ അന്വേഷിക്കപ്പെടും. അല്ലെങ്കില്‍ പൊലീസിനും സര്‍ക്കാരിനും മേല്‍ വലിയ സമ്മര്‍ദ്ദമുണ്ടാകും. പരാതിക്കാരന് ഇനി സാമൂഹിക സ്വാധീനമില്ലെങ്കിലും സമ്പന്നനാണെങ്കില്‍ കേസുകള്‍ ഊര്‍ജ്ജിതമായി അന്വേഷിക്കപ്പെടും. രാജ്യത്തെ നിയമത്തെ കുറിച്ച് ധാരണയുള്ള വിദ്യാസമ്പന്നരായ ആളുകളെങ്കില്‍ അവര്‍ കോടതിയുടെ സഹായം തേടുകയും അന്വേഷണം സജീവമാകുകയും ചെയ്യുന്ന സംഭവങ്ങളും നമുക്കറിയാം. എന്നാല്‍, പൊലീസ് ഫയല്‍ ക്ലോസ് ചെയ്യാന്‍ പോകുന്ന ആറ് മിസ്സിംഗ് കേസുകളും അന്യസംസ്ഥാന തൊഴിലാളികളുടെ മക്കളുടെ തിരോധാന കേസുകളാണ്.

ഈ സമൂഹത്തില്‍ വലിയ സ്വാധീനമില്ലാത്ത 60 കുടുംബങ്ങളുടെ പ്രതീക്ഷകളാണ് കാണാതായ ആ 60 കുട്ടികളും. അവര്‍ക്കെന്തുപറ്റിയെന്നറിയാന്‍ ആ കുടുംബങ്ങളെ പോലെ ഈ പൊതുസമൂഹത്തിനും ഉത്തരവാദിത്തമുണ്ടെന്നും ആനന്ദ് കണ്ണശ കൂട്ടിച്ചേര്‍ത്തു.