തിരുവനന്തപുരം: അനന്തപുരി ചക്ക മഹോത്സവത്തിന് ഇന്ന് പുത്തരിക്കണ്ടം മൈതാനിയില് തുടക്കമാകും. സംസ്ഥാന ഫലമായ ചക്കയുടെ പ്രചരണാര്ത്ഥം സെന്റര് ഫോര് ഇന്നൊവേഷന് ഇന് സയന്സ് ആന്ഡ് സോഷ്യല് ആക്ഷന് (സിസ്സ)യുടെ നേതൃത്വത്തില് ചക്ക കര്ഷകരുടെയും ചക്ക പ്രേമികളുടെയും കൂട്ടായ്മയും പ്രശസ്ത ചക്ക പ്രചാരകരായ ചക്കക്കൂട്ടവും ചേര്ന്നാണ് മഹോല്സവം സംഘടിപ്പിച്ചിരിന്നത്. ജൂലൈ ഒമ്പതുവരെ എല്ലാദിവസവും രാവിലെ 11 മുതല് രാത്രി ഒമ്പതു വരെയാണ് പ്രദര്ശനം. മേളയില് കേരളത്തിനകത്തും പുറത്തുമുള്ള വിവിധയിനം ചക്കകളുടെയും ചക്ക വിഭവങ്ങളുടെയും പ്രദര്ശനവും വില്പ്പനയുമാണ് ഒരുക്കിയിരിക്കുന്നത്.
തേന് വരിക്ക, ചെമ്പരത്തി വരിക്ക, നാടന് വരിക്ക, മുള്ളന് ചക്ക, കൂഴച്ചക്ക, കൊട്ട് വരിക്ക തുടങ്ങി വ്യത്യസ്ത വലിപ്പത്തിലും രുചിയിലുമുള്ള ചക്കകള് ചക്കമഹോല്സവത്തില് അണിനിരക്കും. 100ല്പ്പരം രുചിയേറുന്ന ചക്ക വിഭവങ്ങള് മാത്രമുള്ള ഫുഡ്കോര്ട്ട് മേളയുടെ മറ്റൊരു പ്രത്യേകതയാണ്. ചക്ക മസാലദോശ, ചക്ക പഴംപൊരി, ചക്ക ബജി, ചക്ക മിക്സ്ചര്, ചക്ക അട, ചക്ക കോട്ടപ്പം, ചക്ക ചിപ്സ്, ചക്ക ഉള്ളിവട, ചക്ക മഞ്ചൂരി, ചക്ക മോതകം, ചക്ക മധുരചില്ലി, ചക്ക കട്ലറ്റ് എന്നിവയുടെ വില്പ്പനയും പ്രദര്ശനവുമുണ്ടാകും. ചക്ക കൊണ്ടുണ്ടാക്കിയ കറികളും മേളയിലുണ്ട്. ചക്ക സ്ക്വാഷുകള്, ചക്ക ജാമുകള് എന്നിവയുടെ വില്പ്പനയും പാചക പരിശീലനവും പ്രദര്ശനത്തിലുണ്ട്. കാണാനെത്തുന്നവര്ക്ക് രുചിയുള്ള ചക്കപ്പഴം സൗജന്യമായി കഴിക്കാനും അവസരമുണ്ട്.
നഗരമാകെ പ്ലാവ് എന്ന ആശയം മുന്നിര്ത്തി ഓരോ വീട്ടിലും ഒരു പ്ലാവിന് തൈ നടുക എന്ന ലക്ഷ്യത്തോടെ മുപ്പതില്പരം വ്യത്യസ്തയിനം പ്ലാവിന് തൈകള് കുറഞ്ഞ വിലയ്ക്ക് മേളയില് ലഭിക്കും. ജൈവോല്പ്പന്നങ്ങളുടെ പ്രദര്ശനവും വിപണനവും വിദേശത്ത് നിന്ന് ഇറക്കുമതി ചെയ്ത ചക്കവിഭവങ്ങളും മേളയില് അണിനിരക്കും.
ഇന്ന് രാവിലെ പത്തിന് ഡപ്യൂട്ടി മേയര് പി കെ രാജു ഉദ്ഘാടനം നിര്വഹിക്കും. ”നല്ലഭക്ഷണം, നല്ല ആരോഗ്യം, നല്ലജീവിതം, നമുക്കും വരും തലമുറയ്ക്കും” എന്ന സന്ദേശമുയര്ത്തിയാണ് ഇക്കുറി മേള സംഘടിപ്പിച്ചിരിക്കുന്നത്. വിവിധ ദിവസങ്ങളിലായി മന്ത്രിമാര്, രാഷ്ട്രീയ നേതാക്കള്, സാമൂഹിക-സാംസ്കാരിക രംഗത്തെ പ്രമുഖര്, സിനിമാതാരങ്ങള് എന്നിവര് മേള സന്ദര്ശിക്കും.
Discussion about this post