തിരുവനന്തപുരം: സംസ്ഥാനത്ത് തിങ്കളാഴ്ചയും ശക്തമായ മഴയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രം. ഈ മാസം ഏഴുവരെ മഴ തുടരുമെന്നാണ് മുന്നറിയിപ്പ്. മധ്യ, തെക്കന് കേരളത്തിലെ മലയോര മേഖലകളില് മഴ ശക്തമായേക്കും.
തിങ്കളാഴ്ച രണ്ട് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. ആലപ്പുഴ, എറണാകുളം ജില്ലകളിലാണ് യെല്ലോ അലര്ട്ട്. ചൊവ്വാഴ്ച നാല് ജില്ലകളിലാണ് യെല്ലോ അലര്ട്ട്.
പത്തനംതിട്ടയില് മഴ അതിശക്തമായി തുടരുന്ന സാഹചര്യത്തില് കോന്നി താലൂക്കിലെ എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കളക്ടര് തിങ്കളാഴ്ച അവധി പ്രഖ്യാപിച്ചു. അതേസമയം, മുന് നിശ്ചയിച്ച പൊതുപരീക്ഷകള്ക്ക് മാറ്റം ഉണ്ടാകുന്നതല്ല.
വടക്ക് പടിഞ്ഞാറന് ബംഗാള് ഉള്ക്കടലില് ചക്രവാത ചുഴി രൂപപ്പെട്ടത് 48 മണിക്കൂറിനുള്ളില് ന്യൂനമര്ദം ആയേക്കുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. മണിക്കൂറില് 45 മുതല് 65 കിലോമീറ്റര് വരെ വേഗത്തില് വീശിയേക്കാവുന്ന കാറ്റിനും സാധ്യതയുണ്ട്.
കേരള തീരത്ത് രാത്രി 11.30 വരെ 0.5 മുതല് 2.1 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. മത്സ്യത്തൊഴിലാളികള്ക്കും തീരദേശവാസികള്ക്കും ജാഗ്രത നിര്ദേശമുണ്ട്.
Discussion about this post