കോഴിക്കോട്: വയനാട്ടിലെ നരഭോജി കടുവയെ ആവശ്യമെങ്കില് വെടിവച്ചുകൊല്ലാന് ഉത്തരവുണ്ടായത് കഴിഞ്ഞ ദിവസമാണ്. ഇതിനിടെ സംസ്ഥാനത്ത് വിവിധയിടങ്ങളില് വീണ്ടും വന്യജീവികള് നാട്ടിലിറങ്ങിയത് വാര്ത്തയാകുന്നു. കോഴിക്കോട് ജില്ലയിലെ മുത്തപ്പന് പുഴയില് നാല് വയസുള്ള പുള്ളിപ്പുലിയെ ഇന്ന് ചത്തനിലയില് കണ്ടെത്തി. പുലര്ച്ചെ പാല് സംഭരണത്തിന് പോയ ഓട്ടോക്കാരനാണ് നാല് വയസുള്ള പുലിയെ ചത്ത നിലയില് കണ്ടത്. മുത്തന്പുഴ മൈനവളവ് ഭാഗത്ത് റോഡരികില് തന്നെയാണ് ജഡം കണ്ടത്. ശരീരത്തിലാകെ മുള്ളുകള് പതിച്ചിരുന്നതിനാല് മുള്ളന്പന്നിയുടെ ആക്രമണത്തിലാണ് പുലി ചത്തതെന്നാണ് നിഗമനം.
മാസങ്ങള്ക്കിടെ ഈ ഭാഗത്ത് പുലിയുടെ ആക്രമണം ഉണ്ടായതായി പരാതിയുയര്ന്നിരുന്നു. ഇതിനിടെയാണ് ഇന്ന് പുലിയുടെ മൃതദേഹം കണ്ടത്. മുത്തപ്പുഴ-മറിപ്പുഴ പ്രദേശത്ത് രണ്ട് മാസം മുന്പ് ഒരു മൂരിക്കിടാവിനെ പുലി ആക്രമിച്ച് കൊന്നു. മാത്രമല്ല ഇവിടെ പലയിടത്തും നാട്ടുകാര് പുലിയെ കണ്ടിരുന്നു. എന്നാല് ഇതില് അന്വേഷണം നടന്നിട്ടില്ലെന്ന് നാട്ടുകാര് പരാതിപ്പെട്ടു.
അതേസമയം പുല്ലരിയാന് പോയ യുവാവിനെ കൊന്നു തിന്ന സംഭവത്തില് വയനാട്ടിലെ നരഭോജി കടുവയെ മയക്കുവെടിവച്ച് പിടികൂടാന് കഴിഞ്ഞദിവസം ഉത്തരവായിരുന്നു. ആവശ്യമെങ്കില് കൊല്ലാമെന്നും ഉത്തരവില് വ്യക്തമാക്കുന്നുണ്ട്. ചീഫ് വൈല്ഡ് ലൈഫ് വാര്ഡനാണ് ഉത്തരവ് പുറപ്പെടുവിച്ചത്. വാകേരി മൂടക്കൊല്ലി മരോട്ടി തടത്തില് പ്രജീഷാണ് (36) മരിച്ചത്.ശനിയാഴ്ച വൈകിട്ട് മൂന്ന് മണിയോടെ മൂടക്കൊല്ലിക്കടുത്ത് നാരായണപുരത്ത് കടുവ പാതി ഭക്ഷിച്ച നിലയില് പ്രജീഷിന്റെ മൃതദേഹം കണ്ടെത്തുകയായിരുന്നു.
പ്രജീഷിന്റെ മൃതദേഹം കണ്ടെത്തിയതിനെത്തുടര്ന്ന് പ്രദേശവാസികള് പ്രതിഷേധവുമായി രംഗത്തിറങ്ങിയിരുന്നു. നരഭോജി കടുവയെ വെടിവെച്ച് കൊല്ലുക, നഷ്ടപരിഹാരം നല്കുക എന്നീ ആവശ്യങ്ങളും ഉന്നയിച്ചിരുന്നു. കടുവയെ പിടികൂടാന് ഉത്തരവിറങ്ങിയതോടെ നാട്ടുകാര് പ്രതിഷേധം അവസാനിപ്പിച്ചു.
