കെ.സുരേന്ദ്രന്‍ നയിക്കുന്ന കേരള പദയാത്രയ്ക്ക് കാസര്‍കോട് തുടക്കം

തിരുവനന്തപുരം: കേന്ദ്രസര്‍ക്കാരിന്റെ വിവിധ പദ്ധതികള്‍ സംസ്ഥാനത്തെ ജനങ്ങളിലേക്ക് എത്തിക്കുന്നതിനായി ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍ നയിക്കുന്ന കേരള പദയാത്ര ഇന്ന് കാസര്‍കോട് ആരംഭിക്കും. വൈകിട്ട് മൂന്നിന് താളിപ്പടത്ത് മൈതാനത്തില്‍ നടക്കുന്ന ചടങ്ങ് ഗോവ മുഖ്യമന്ത്രി പ്രമോദ് സാവന്ത് ഉദ്ഘാടനം ചെയ്യും. രാവിലെ കാസര്‍കോട് മധൂര്‍ ക്ഷേത്രത്തില്‍ ദര്‍ശനം നടത്തിയ ശേഷം കേരള പദയാത്രയോടനുബന്ധിച്ച് ജില്ലയിലെ മറ്റ് പരിപാടികള്‍ക്ക് കെ സുരേന്ദ്രന്‍ തുടക്കം കുറിക്കും. ആദ്യ ദിവസത്തെ പദയാത്ര മേല്‍പ്പറമ്പില്‍ സമാപിക്കും.

നാളെ രാവിലെ 10: 30 ന് കുമ്പളയില്‍ നടക്കുന്ന കേന്ദ്രസര്‍ക്കാര്‍ പദ്ധതികളുടെ ഗുണഭോക്താക്കളുമായി കെ.സുരേന്ദ്രന്‍ കൂടിക്കാഴ്ച നടത്തും. കാസര്‍കോട് ലോക്‌സഭാ മണ്ഡലത്തിലെ മത-സാമുദായിക-സാംസ്‌കാരിക നേതാക്കളുടെ സ്‌നേഹ സംഗമം പരിപാടിയിലും അദ്ദേഹം പങ്കെടുക്കും.

29-ന് കണ്ണൂരിലും 30-ന് വയനാട്ടിലും ജനുവരി 31-ന് വടകരയിലും പദയാത്ര നടക്കും. ഫെബ്രുവരി 3 മുതല്‍ 7 വരെ ആറ്റിങ്ങല്‍, പത്തനംതിട്ട, കൊല്ലം, മാവേലിക്കര മണ്ഡലങ്ങളിലും പദയാത്ര നടക്കും. കോട്ടയം, ആലപ്പുഴ, തിരുവനന്തപുരം മണ്ഡലങ്ങളില്‍ ഫെബ്രുവരി 9 മുതല്‍ 12 വരെ നടക്കും. ഫെബ്രുവരി 14-ന് ഇടുക്കിയിലും 15-ന് ചാലക്കുടിയിലും. ഫെബ്രുവരി 19 മുതല്‍ 21 വരെ മലപ്പുറം, കോഴിക്കോട്, ആലത്തൂര്‍ മണ്ഡലങ്ങളില്‍ നടക്കും. കേരള പദയാത്ര 23-ന് പൊന്നാനിയിലും 24-ന് എറണാകുളത്തും 26-ന് തൃശൂരിലും നടക്കും. 27 ന് പാലക്കാടാണ് കേരളപദയാത്രയുടെ സമാപനം.

കേരള പദയാത്രയുടെ ഭാഗമായി എല്ലാ ദിവസവും വിവിധ കേന്ദ്രമന്ത്രിമാരും കേന്ദ്ര നേതാക്കളും പരിപാടിയില്‍ പങ്കെടുക്കും. പരിപാടിയില്‍ കേന്ദ്ര സര്‍ക്കാരിന്റെ വിവിധ പദ്ധതികളെ കുറിച്ചുള്ള ചര്‍ച്ചകളും നടക്കും. സമൂഹത്തിന്റെ വിവിധ മേഖലകളില്‍ വ്യക്തിമുദ്ര പതിപ്പിച്ച വ്യക്തികള്‍ ഉള്‍പ്പെടെ 25,000 പേര്‍ കേരള പദയാത്രയില്‍ പങ്കെടുക്കും. കേന്ദ്ര സര്‍ക്കാരിന്റെ വികസന ക്ഷേമ പദ്ധതികളില്‍ അംഗമാകാന്‍ കേരള പദയാത്ര കേരളത്തിലെ ജനങ്ങള്‍ക്ക് അവസരമൊരുക്കും. അതിനായി പ്രത്യേക ഹെല്‍പ്പ് ഡെസ്‌കുകളും ഒരുക്കിയിട്ടുണ്ട്.