ബാംഗ്ലൂര്: അനധികൃത ഖനനം നടത്തിയെന്നകാരണത്താല് കര്ണാടക മുന്മന്ത്രി ജനാര്ദന റെഡ്ഡി, അദ്ദേഹത്തിന്റെ സഹോദരീ ഭര്ത്താവും ഒബുലപുരം ഖനി കമ്പനി ഡയറക്ടറുമായ ഡി.വി.ശ്രീനിവാസന് റെഡ്ഡി എന്നിവരെ സി.ബി.ഐ അറസ്റ്റ് ചെയ്തു. ജനാര്ദന റെഡ്ഡിയുടെ ബെല്ലാരിയിലുള്ള വസതിയും ശ്രീനിവാസന് റെഡ്ഡിയുടെ ബാംഗ്ലൂരിലുള്ള വസതിയും റെയ്ഡ് ചെയ്ത ശേഷമാണ് സി.ബി.ഐ ഇരുവരെയും അറസ്റ്റ് ചെയ്തത്. തിങ്കളാഴ്ച രാവിലെ ആറ് മണിയ്ക്കാണ് റെയ്ഡ് നടത്തിയത്.
ക്രിമിനല് ഗൂഢാലോചന, വഞ്ചന, അഴിമതി തടയല് എന്നീ വകുപ്പുകള് അനുസരിച്ചാണ് അറസ്റ്റ് നടന്നിട്ടുള്ളത്. ഇരുവരെയും ഹൈദരാബാദിലേയ്ക്ക് കൊണ്ടുപോയി. ഇവരെ സി.ബി.ഐ കോടതിയില് ഹാജരാക്കും. ജനാര്ദ്ദന റെഡ്ഡിക്കെതിരെ സന്ദൂര് ജുഡീഷ്യല് മജിസ്ട്രേട്ട് കോടതി ഒമ്പത് ജാമ്യമില്ലാ വാറന്റുകള് പുറപ്പെടുവിച്ചിരുന്നു.
അനധികൃതമായി ഖനനം നടത്തിയതിന് റെഡ്ഡി സഹോദരന്മാരായ ജനാര്ദന റെഡ്ഡി, കരുണാകര റെഡ്ഡി എന്നിവര്ക്കെതിരെ ലോകായുക്ത റിപ്പോര്ട്ടില് പരാമര്ശമുണ്ടായിരുന്നു. കര്ണാടകയില് നിന്ന് ഇരുമ്പയിര് കടത്തിയതായാണ് ഇവര്ക്കെതിരെ റിപ്പോര്ട്ടില് പരാമര്ശിച്ചിരുന്നത്. ലോകായുക്ത റിപ്പോര്ട്ടില് പേര് വന്ന ശേഷമാണ് ജനാര്ദന റെഡ്ഡിയ്ക്ക് മന്ത്രിസ്ഥാനം നഷ്ടപ്പെട്ടത്.
ആന്ധ്രാപ്രദേശിലാണ് ഒബുലപുരമെങ്കിലും ബെല്ലാരിയിലാണ് ഒബുലപുരം ഖനി കമ്പനിയുടെ പ്രധാന ഓഫീസ്. എട്ട് വര്ഷം മുമ്പ് ആന്ധ്രാപ്രദേശ് മുഖ്യമന്ത്രി വൈ.എസ്.രാജശേഖര റെഡ്ഡിയാണ് ഇവര്ക്ക് ഖനനത്തിനുള്ള ലൈസന്സ് നല്കിയത്.
Discussion about this post