കാസര്ഗോഡ്: ശ്രീരാമദാസമിഷന് പ്രസ്ഥാനങ്ങളുടെ ആഭിമുഖ്യത്തില് നടക്കുന്ന ശ്രീരാമനവമി മഹോത്സവത്തിന്റെ ഭാഗമായ ശ്രീരാമനവമി രഥയാത്ര മാര്ച്ച് 3ന് കാസര്ഗോഡ് ജില്ലയില് പരിക്രമണം ആരംഭിക്കും. ജനുവരി 31ന് കൊല്ലൂര് ശ്രീമൂകാംബികാദേവീക്ഷേത്ര സന്നിധിയില് നിന്നും ശ്രീരാമദാസമിഷന് അധ്യക്ഷന് ശ്രീശക്തി ശാന്താനന്ദ മഹര്ഷി ഭദ്രദീപ പ്രതിഷ്ഠ നടത്തി ആരംഭിച്ച രഥയാത്ര കാശ്മീരിലേക്കും അവിടെ നിന്നും ഭാരതത്തിലെ 10 സംസ്ഥാനങ്ങളിലെ പുണ്യതീര്ത്ഥങ്ങളിലെ സ്വീകരണങ്ങള്ക്കും ശേഷമാണ് മാര്ച്ച് 3ന് കേരളത്തിലേക്ക് കടക്കുന്നത്. ജഗദ്ഗുരു സ്വാമി സത്യാനന്ദ സരസ്വതി തൃപ്പാദങ്ങളുടെ നവതി വര്ഷമായതിനാല് ഇക്കുറി കാശ്മീര് മുതല് കന്യാകുമാരി വരെയാണ് രഥയാത്ര സംഘടിപ്പിച്ചിട്ടുള്ളത്.
മാര്ച്ച് 3നും 4നും കാസര്ഗോഡ് ജില്ലയിലും 5നും 6നും കണ്ണൂര്, 7ന് വയനാട്, 8, 9 തീയതികളില് കോഴിക്കോട്, 10, 11 മലപ്പുറം, 12ന് പാലക്കാട്, 13 പാലക്കാട്-തൃശ്ശൂര്, 14 തൃശ്ശൂര്-എറണാകുളം, 15 എറണാകുളം-ഇടുക്കി, 16 ഇടുക്കി-പത്തനംതിട്ട, 17 പത്തനംതിട്ട, 18 കോട്ടയം, 19 കോട്ടയം-ആലപ്പുഴ, 20 ആലപ്പുഴ, 21, 22 കൊല്ലം, 23ന് തിരുവനന്തപുരം ജില്ലയില് പ്രവേശിച്ച് കന്യാകുമാരിയിലേക്കും സാഗരപൂജയ്ക്കു ശേഷം 24ന് തിരുവനന്തപുരം ജില്ലയിലെ നഗരപരിധിയിലുള്ള ക്ഷേത്രങ്ങളില് ശ്രീരാമായണ കാണ്ഡ പരിക്രമണവും 25ന് ശ്രീരാമദാസ ആശ്രമം പ്രദേശങ്ങളിലുള്ള ശ്രീരാമായണകാണ്ഡ പരിക്രമണത്തിനും ശേഷം വൈകുന്നേരം ശ്രീരാമദാസ ആശ്രമത്തില് എത്തിച്ചേരും. 26ന് ശ്രീരാമദാസ ആശ്രമത്തില് ശ്രീരാമനവമി സമ്മേളനം നടക്കും. 27ന് പാദുക സമര്പ്പണശോഭായാത്രയ്ക്കു ശേഷം ആശ്രമത്തില് എത്തിച്ചേരുന്നതോടെ ശ്രീരാമനവമി രഥയാത്ര സമ്പൂര്ണ്ണമാകും.
