തൃശൂര്‍ : യുപിഎ സര്‍ക്കാര്‍ രൂപം കൊടുത്തിട്ടുള്ള സാമുദായിക കലാപ വിരുദ്ധ ബില്‍ ദേശവിരുദ്ധമായ ഒന്നാണ് ആര്‍എസ്എസ് ക്ഷേത്രീയ ബൗദ്ധിക് പ്രമുഖ് ജെ.നന്ദകുമാര്‍ പറഞ്ഞു. ഭാരതത്തിന്റെ ഹിന്ദുസ്വഭാവം ഇല്ലാതാക്കാനുള്ള ഗൂഢനീക്കത്തിന്റെ ഭാഗമാണിതെന്ന് അദ്ദേഹം കൂട്ടിച്ചേര്‍ത്തു. തൃശൂരില്‍ കേസരി വാരികയുടെ അറുപതാം വാര്‍ഷികാഘോഷത്തിന്റെ സ്വാഗതസംഘ രൂപീകരണ ചടങ്ങില്‍ സാമുദായിക കലാപ ബില്ലിനെക്കുറിച്ച് മുഖ്യപ്രഭാഷണം നടത്തുകയായിരുന്നു അദ്ദേഹം.
ന്യൂനപക്ഷ വോട്ടുബാങ്ക് ലക്ഷ്യമിട്ടുകൊണ്ടുള്ള ബില്‍ ഹിന്ദു സമൂഹത്തെ അടിച്ചമര്‍ത്താനും ലക്ഷ്യമിടുന്നു. ഹിന്ദു സമൂഹത്തില്‍ പിളര്‍പ്പുണ്ടാക്കാന്‍ ഗൂഢതന്ത്രമാണ് ബില്ലില്‍ മെനഞ്ഞിരിക്കുന്നത്. ന്യൂനപക്ഷങ്ങള്‍ കലാപമുണ്ടാക്കിയാലും എല്ലാ ആനുകൂല്യങ്ങളും അവര്‍ക്ക് ലഭിക്കുന്ന തരത്തില്‍ രൂപപ്പെടുത്തിയിട്ടുള്ള ബില്ലിനെതിരെ സമൂഹ മനസ്സാക്ഷി ഉണര്‍ന്ന് പ്രവര്‍ത്തിക്കേണ്ടതുണ്ട്. സാമുദായിക കലാപം ഉടലെടുത്താലും പ്രതികള്‍ ഹിന്ദുക്കളാണെന്ന വിചിത്ര സാഹചര്യമാണ് ഇതിലൂടെ സൃഷ്ടിക്കപ്പെടുക. ന്യൂനപക്ഷ വിഭാഗങ്ങളെ സംരക്ഷിക്കാനെന്ന പേരിലാണ് ബില്ലിനു രൂപംകൊടുത്തിട്ടുള്ളത്. എന്നാല്‍ കാശ്മീരില്‍ ഹിന്ദുക്കള്‍ ന്യൂനപക്ഷമായതിനാല്‍ അവിടെ ബില്ല് ബാധകമാകില്ല എന്നതും വൈരുദ്ധ്യമാണ്. നരേന്ദ്രമോഡിയെപ്പോലുള്ള ദേശീയവാദികളെ എങ്ങിനെയെങ്കിലും കേസില്‍കുടുക്കുക എന്ന ഗൂഢതന്ത്രവും ഇതിനു പിന്നിലുണ്ട്.
വനിതാകോഡ് ബില്ല് അവതരിപ്പിച്ച വി.ആര്‍.കൃഷ്ണയ്യര്‍ക്കെതിരെ ന്യൂനപക്ഷങ്ങള്‍ തിരിഞ്ഞപ്പോള്‍ അദ്ദേഹം പറഞ്ഞ അഭിപ്രായത്തിന്റെ അടിസ്ഥാനത്തില്‍ കൃഷ്ണയ്യരെ വരെ തുറുങ്കിലടക്കാവുന്ന തരത്തിലുള്ളതാണ് വരാന്‍ പോകുന്ന സാമുദായിക കലാപ ബില്ലെന്നും അദ്ദേഹം കൂട്ടിച്ചേര്‍ത്തു. ചടങ്ങില്‍ സി.കെ.സജിനാരായണന്‍ അദ്ധ്യക്ഷത വഹിച്ചു. ജി.മഹാദേവന്‍, കെ.എസ്.ജയചന്ദ്രന്‍, കെ.സുരേഷ്‌കുമാര്‍ എന്നിവര്‍ സംസാരിച്ചു.
Discussion about this post