തിരുവനന്തപുരം: വിരമിക്കല് പ്രായം 56 വയസ്സാക്കിയതുമായി ബന്ധപ്പെട്ട് 13678 തസ്തികകള് സൂപ്പര് ന്യൂമററിയായി സൃഷ്ടിക്കാന് മന്ത്രിസഭായോഗം അനുമതി നല്കി. വിരമിക്കല് പ്രായം വര്ധിപ്പിച്ചില്ലെങ്കില് ഉണ്ടാകുമായിരുന്ന എല്ലാ തസ്തികകളിലും പുതിയ ഉദ്യോഗാര്ഥികളെ പ്രവേശിപ്പിക്കാന് സര്ക്കാരിന് ധാര്മിക ബാധ്യതയുണ്ടെന്ന് മന്ത്രിസഭായോഗ തീരുമാനങ്ങള് വിശദീകരിച്ചുകൊണ്ട് മുഖ്യമന്ത്രി ഉമ്മന് ചാണ്ടി വ്യക്തമാക്കി.
മാര്ച്ച് 31ന് 13678 പേര് വിരമിക്കാനിരിക്കെയാണ് പെന്ഷന് പ്രായം വര്ധിപ്പിക്കുന്ന തീരുമാനമെടുത്തത്. അതുകൊണ്ട് ഇത്രയും തസ്തികകള് സൂപ്പര് ന്യൂമററിയായി സൃഷ്ടിക്കും. വിരമിക്കല് പ്രായം വര്ധിപ്പിച്ചതുകൊണ്ട് ഒരാള്ക്കുപോലും തൊഴിലവസരം നഷ്ടപ്പെടരുതെന്ന് സര്ക്കാരിന് നിര്ബന്ധമുണ്ട്. ഇതിനോടകം തന്നെ 10686 ഒഴിവുകള് പി.എസ്.സിക്ക് റിപ്പോര്ട്ട് ചെയ്തുകഴിഞ്ഞു. ബാക്കിയുള്ള 2992 തസ്തികകള് ഉടനെതന്നെ റിപ്പോര്ട്ട് ചെയ്യും.
സ്കൂള് അധ്യാപകരുടെ കാര്യത്തില് പ്രത്യേക പാക്കേജ് വ്യാഴാഴ്ച ധനമന്ത്രി നിയമസഭയില് പ്രഖ്യാപിക്കും. പെന്ഷന് പ്രായം വര്ധിപ്പിച്ചതിനെത്തുടര്ന്ന് ഇടതുപക്ഷ സംഘടനകള് സമരം നടത്തുന്നതെന്തിനാണെന്ന് മനസ്സിലാകുന്നില്ല. എല്.ഡി.എഫ് സര്ക്കാരിന്റെ കാലത്ത് നിരവധി പൊതുമേഖലാ സ്ഥാപനങ്ങളില് പെന്ഷന് പ്രായം 58 വയസ്സാക്കിയിരുന്നതായും മുഖ്യമന്ത്രി ചൂണ്ടിക്കാട്ടി.
Discussion about this post