ന്യൂഡല്‍ഹി: കോവിഡ് പ്രതിസന്ധി മറികടന്നുകൊണ്ട് ഗഗന്‍യാന്‍ വിക്ഷേപണ പദ്ധതികള്‍ വേഗത്തിലാക്കിയതായി കേന്ദ്ര ബഹിരാകാശ വകുപ്പ് അറിയിച്ചു. ആഗോള തലത്തില്‍ ഉണ്ടായ വിവിധതരത്തിലെ സാങ്കേതിക തടസ്സങ്ങള്‍ നിലവില്‍ മാറിയെന്നും ഇന്ത്യന്‍ ബഹിരാകാശ രംഗം വരും കൊല്ലങ്ങളില്‍ ചരിത്ര നേട്ടം കൈവരിക്കുമെന്നും കേന്ദ്ര ബഹിരാകാശ വകുപ്പ് മന്ത്രി ഡോ. ജിതേന്ദ്ര സിംഗ് പറഞ്ഞു.
ഈ വര്‍ഷം മനുഷ്യരഹിത ഗഗന്‍യാന്‍ പദ്ധതിയുമായാണ് ഇസ്റോ മുന്നോട്ട് പോകുന്നത്. വ്യോംമിത്ര എന്നപേരിലുള്ള റോബോട്ടിനെ വഹിക്കുന്ന രണ്ടാമത്തെ ദൗത്യവും രണ്ടാം ഘട്ടമായി നടക്കും. മൂന്നാമത്തെ ഘട്ടമാണ് വൈമാനികരുമായി കുതിച്ചുയരുകയെന്നും ജിതേന്ദ്രസിംഗ് പറഞ്ഞു.
നിലവില്‍ പരിശീലിച്ചുകൊണ്ടിരിക്കുന്ന ബഹിരാകാശ സഞ്ചാരികള്‍ വിവിധ ഘട്ടങ്ങള്‍ പൂര്‍ത്തിയാക്കിയിട്ടുണ്ട്. ഇന്ത്യയുടെ സ്വന്തം ഗഗന്‍യാന്‍ ഉപഗ്രഹം ബഹിരാകാശത്തിലേക്ക് രണ്ടു വര്‍ഷത്തിനുള്ളില്‍ കുതിക്കുമെന്നും സിംഗ് പറഞ്ഞു. റഷ്യയിലെ ജനറിക് ബഹിരാകാശ നിലയത്തിലാണ് ഇന്ത്യന്‍ വൈമാനികര്‍ പരിശീലിക്കുന്നത്. തുടര്‍ന്നുള്ള പരിശീലനം ബംഗ്ലൂരിലെ പരിശീലന കേന്ദ്രത്തിലും നടത്തുമെന്നും മന്ത്രി പറഞ്ഞു.
ഗഗന്‍യാനിലെ ക്രൂ എസ്‌കേപ്പിംഗ് സംവിധാനമെന്നത് പത്തുകിലോമീറ്റര്‍ ദൂരപരിധിയില്‍ നിന്ന് നടത്തേണ്ട ഒന്നാണെന്നും അത്തരം പരീക്ഷണം നിര്‍ണ്ണായകമാണെന്നും അവയ്ക്കായുള്ള തയ്യാറെടുപ്പ് നടന്നുവരുന്നതായും ജിതേന്ദ്രസിംഗ് അറിയിച്ചു. ഇന്ത്യയുടെ ബഹിരാകാശ സംവിധാനം കൂടുതല്‍ കാര്യക്ഷമമാകാന്‍ സ്വകാര്യ സംരംഭകരുടെ കരുത്തുറ്റ പിന്തുണയും ആവശ്യമുണ്ടെന്നും അത് വിദേശരാജ്യങ്ങളെ സമീപിക്കുന്ന ചിലവ് ഇല്ലാതാക്കു മെന്നും തദ്ദേശീയമായ കരുത്ത് കൂട്ടാനാകുമെന്നും ജിതേന്ദ്രസിംഗ് കൂട്ടിച്ചേര്‍ത്തു.
Discussion about this post