ന്യൂഡല്‍ഹി: രാജ്യസഭയില്‍ നന്ദിപ്രമേയ ചര്‍ച്ചക്കുള്ള മറുപടി പ്രസംഗത്തില്‍ കോണ്‍ഗ്രസിനെയും ഗാന്ധി കുടുംബത്തെയും രൂക്ഷമായ ഭാഷയില്‍ വിമര്‍ശിച്ച് പ്രധാനമന്ത്രി നരേന്ദ്ര മോദി. ഗാന്ധി കുടുംബവും കോണ്‍ഗ്രസും ചേര്‍ന്ന് രാജ്യത്തെ തകര്‍ത്തു. വീണുകിടന്ന രാജ്യത്തെ ബിജെപിയാണ് പടുത്തുയര്‍ത്തിയത്. കോണ്‍ഗ്രസ് വിജ്ഞാനത്തിന്റെയും സാങ്കേതികവിദ്യയുടെയും വിരോധികളാണ്. കോണ്‍ഗ്രസിന്റെ അക്കൗണ്ട് പൂട്ടിച്ചതിന്റെ വിഷമം മനസിലാകുന്നുണ്ട്. കണ്ണീരൊഴുക്കിയിട്ട് കാര്യമില്ല, ജനം നിങ്ങളെ തള്ളിക്കഴിഞ്ഞുവെന്നും പ്രധാനമന്ത്രി പറഞ്ഞു.
ഗാന്ധി കുടുംബത്തിലെ അടുത്ത തലമുറയിലെ ആരും പേരിനൊപ്പം നെഹ്‌റുവെന്ന് ചേര്‍ക്കുന്നില്ല. പേരിനോടൊപ്പം നെഹ്‌റുവെന്ന് ചേര്‍ക്കാന്‍ അവര്‍ക്ക് പേടിയാണ്. രാജ്യം ഒരു കുടുംബത്തിന്റെയും കീഴിലല്ല നിലനില്‍ക്കുന്നത്.
2047ല്‍ ഇന്ത്യയെ വികസിത രാജ്യമാക്കുകയാണ് തങ്ങളുടെ ലക്ഷ്യം. രാജ്യത്തിന് വേണ്ടിയാണ് ഞങ്ങള്‍ പോരാടുന്നത്. ഒരാള്‍ ഇത്രയും ആളുകള്‍ക്കെതിരേ പോരാടുന്നു. ഈ പോരാട്ടത്തില്‍ രാജ്യത്തിന് വേണ്ടി മരിക്കാന്‍ പോലും തയാറാണെന്നും മോദി പറഞ്ഞു.
കര്‍ഷകരെ കോണ്‍ഗ്രസ് നിരവധിതവണ ചൂഷണം ചെയ്തു. ആര്‍ട്ടിക്കിള്‍ 356 അധികം ഉപയോഗിച്ചത് കോണ്‍ഗ്രസാണ്. 50 തവണയാണ് ഇവര്‍ ഈ നീക്കം നടത്തിയത്. പാപികളായ കോണ്‍ഗ്രസുകാര്‍ രാജ്യത്തെ തകര്‍ക്കുകയായിരുന്നു.
വിമര്‍ശനങ്ങള്‍ ഉയര്‍ത്താന്‍ എത്ര ശ്രമിച്ചാലും ജനം സര്‍ക്കാരിന്റെ നേട്ടങ്ങള്‍ ശ്രദ്ധിക്കും. ബിജെപി ശ്രദ്ധിക്കുന്നത് എല്ലാവരുടെയും ശാക്തീകരണമാണ്. രാജ്യം വികസനപാതയിലാണ്, ജനങ്ങളുടെ ആശിര്‍വാദം ബിജെപിക്കുണ്ട്. ചിലരുടെ രാഷ്ട്രീയ താല്‍പര്യത്തിനായി സമൂഹത്തെ കബളിപ്പിക്കുന്ന പരിപാടി ഞങ്ങള്‍ക്കില്ല. ആദിവാസികളുടെ ഫണ്ട് ബജറ്റില്‍ അഞ്ചിരട്ടിയാക്കിയത് ബിജെപിയാണ്.
പ്രതിപക്ഷം തടസപ്പെടുത്തുമ്പോഴും തന്റെ വാക്കുകള്‍ ജനം ശ്രദ്ധയോടെയാണ് കേള്‍ക്കുന്നത്. പ്രതിപക്ഷം സര്‍ക്കാരിനുമേല്‍ തുടര്‍ച്ചയായി ചെളി എറിയാനാണ് ശ്രമിക്കുന്നത്. എന്നാല്‍ ഈ ചെളിയില്‍ താമര ശക്തമായി വളരുമെന്ന് വിമര്‍ശകര്‍ ഓര്‍ക്കണമെന്നും പ്രധാനമന്ത്രി കൂട്ടിച്ചേര്‍ത്തു.
പ്രതിപക്ഷ നേതാവ് മല്ലികാര്‍ജുന്‍ ഖാര്‍ഗെയും മോദി രൂക്ഷമായി വിമര്‍ശിച്ചു. കര്‍ണാടകയ്ക്ക് വേണ്ടി ഖാര്‍ഗെ ഒന്നും ചെയ്തിട്ടില്ല. ഖാര്‍ഗെയുടെ മണ്ഡലത്തില്‍ വികസനം എത്തിച്ചത് ബിജെപിയാണ്. സ്വന്തം തട്ടകത്തില്‍ താന്‍ എത്തിയതിലുള്ള പ്രതിഷേധമാണ് അദ്ദേഹം തനിക്കെതിരേ വിമര്‍ശനം ഉന്നയിക്കാനുള്ള കാരണമെന്നും മോദി വ്യക്തമാക്കി.
അതേസമയം, സഭയില്‍ പ്രധാനമന്ത്രി സംസാരിക്കാന്‍ എഴുന്നേറ്റത് മുതല്‍ പ്രസംഗം അവസാനിക്കുന്നത് വരെ പ്രതിപക്ഷം ബഹളം തുടര്‍ന്നു. മോദി- അദാനി, ഭായ് ഭായ് എന്ന മുദ്രാവാക്യം വിളിച്ചാണ് പ്രതിപക്ഷ അംഗങ്ങള്‍ ബഹളം വച്ചത്. മോദി- അദാനി ബന്ധത്തില്‍ ജെപിസി അന്വേഷണം വേണമെന്ന ആവശ്യവും പ്രതിപക്ഷം ഉന്നയിച്ചു
Discussion about this post