തിരുവനന്തപുരം: വിശ്വമലയാള മഹോത്സവത്തിനെതിരെ സാംസ്കാരിക സ്ഥാപനങ്ങളിലെ സര്‍ക്കാര്‍ നോമിനികളായ ചില പ്രതിനിധികള്‍ പരസ്യമായി കൈക്കൊണ്ട നിലപാടുകള്‍ സംബന്ധിച്ച് സാംസ്കാരിക വകുപ്പ് പ്രിന്‍സിപ്പല്‍ സെക്രട്ടറി സാജന്‍പീറ്റര്‍ സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തില്‍ സാഹിത്യ അക്കാദമി ജനറല്‍ കൌണ്‍സില്‍ പുനഃസംഘടിപ്പിച്ചതായി സാംസ്കാരിക മന്ത്രി കെ.സി.ജോസഫ് പറഞ്ഞു.
സാഹിത്യ അക്കാദമി പ്രസിഡന്റ് പെരുമ്പടവം ശ്രീധരന്‍, സെക്രട്ടറി ആര്‍.ഗോപാലകൃഷ്ണന്‍, വൈസ് പ്രസിഡന്റ് അക്ബര്‍ കക്കട്ടില്‍, ജോസ് പനച്ചിപ്പുറം, പ്രൊഫ.ഡി.ബഞ്ചമിന്‍, ഡോ.ഷൊര്‍ണ്ണൂര്‍ കാര്‍ത്തികേയന്‍, ചൊവ്വല്ലൂര്‍ കൃഷ്ണന്‍കുട്ടി, പ്രൊഫ.സന്തോഷ് ജെ.കെ.വി., ഇബ്രാഹിം ബേവിഞ്ച, എം.ഡി.രാജേന്ദ്രന്‍, വിജയലക്ഷ്മി, പികെ.പാറക്കടവ്, ജോണ്‍ സാമുവല്‍, അജിതന്‍ മേനോത്ത്, ജന്നിംഗ്സ് ജേക്കബ്, വാണിദാസ് എളയാവൂര്‍, ഇന്ദുമേനോന്‍, സാംസ്കാരിക വകുപ്പ് പ്രിന്‍സിപ്പല്‍ സെക്രട്ടറി സാജന്‍ പീറ്റര്‍, ജില്ലാ കളക്ടര്‍, തൃശൂര്‍,-ട്രഷറര്‍, കേരള സംഗീത നാടക അക്കാഡമി പ്രതിനിധി, കേരള ലളിതകലാ അക്കാഡമി പ്രതിനിധി, കേരള ഫോക്ക് ലോര്‍ അക്കാഡമി പ്രതിനിധി, കേരള കലാമണ്ഡലം കല്പിത സര്‍വകലാശാല പ്രതിനിധി, കേരള സംസ്ഥാന ചലച്ചിത്ര അക്കാഡമി പ്രതിനിധി, വൈലോപ്പിള്ളി സംസ്കൃതി ഭവന്‍ പ്രതിനിധി, കേരള സാഹീത്യ അക്കാദമി ആര്‍ട്ടിക്കിള്‍സ് ഓഫ് അസോസിയേഷന്‍ 10 (8) പ്രകാരം തെരഞ്ഞെടുക്കുന്ന 10 പേര്‍. തുടങ്ങിയവര്‍ അംഗങ്ങളായും അക്കാദമി പുനഃസംഘടിപ്പിച്ചു.
ബാലചന്ദ്രന്‍ വടക്കേടത്തിനെ സാഹിത്യ അക്കാഡമി വൈസ് പ്രസിഡന്റ് സ്ഥാനത്തുനിന്നും ഡോ. സത്യജിത്, ഡോ.അജയപുരം ജ്യോതിഷ്കുമാര്‍, ഗിരിജ സേതുനാഥ് എന്നിവരെ ജനറല്‍ കൌണ്‍സിലില്‍ നിന്നും അന്വേഷണ റിപ്പോര്‍ട്ടിന്റെ അടിസ്ഥാനത്തില്‍ ഒഴിവാക്കി. കൂടാതെ ഡോ.പ്രമീളാദേവിയെയും കൌണ്‍സിലില്‍ നിന്നും ഒഴിവാക്കി. വൈലോപ്പിള്ളി സംസ്കൃതി ഭവന്‍ പ്രതിനിധി എന്ന നിലയില്‍ സാഹിത്യ അക്കാഡമി ജനറല്‍ കൌണ്‍സില്‍ അംഗം സുദര്‍ശനന്‍ കാര്‍ത്തികപ്പറമ്പിലിനെ വൈലോപ്പിള്ളി സംസ്കൃതി ഭവന്‍ ഭരണ സമിതിയില്‍ നിന്നും, കേരള സംഗീത നാടക അക്കാഡമി പ്രതിനിധി എന്ന നിലയില്‍ സാഹിത്യ അക്കാഡമി ജനറല്‍ കൌണ്‍സില്‍ അംഗം എല്‍.വി.ഹരികുമാറിനെ സംഗീത നാടക അക്കാഡമി ഭരണസമിതിയില്‍ നിന്നും ഒഴിവാക്കിയിട്ടുള്ളതായും അദ്ദേഹം പറഞ്ഞു.
