ന്യൂഡല്ഹി: രാജ്യത്തെ മികച്ച കമ്പനികളില് ടാറ്റയുടെ ഐടി സ്ഥാപനമായ ടിസിഎസ് ഒന്നാം സ്ഥാനത്ത്. ഫോര്ച്യൂണ് മാഗസിന് പുറത്തിറക്കിയ രാജ്യത്തെ പത്ത് മികച്ച ഇന്ത്യന് കമ്പനികളുടെ പട്ടികയിലാണ് ടിസിഎസ് ഒന്നാം സ്ഥാനം കരസ്ഥമാക്കിയിരിക്കുന്നത്. ബഹുരാഷ്ട്ര കമ്പനിയായ ഹിന്ദുസ്ഥാന് യൂണിലിവറാണ് പട്ടികയില് രണ്ടാമത്. മൂന്നാം സ്ഥാനം ഐടിസിയും ഇന്ഫോസിസും പങ്കിട്ടു.
കഴിഞ്ഞ വര്ഷത്തെ ജേതാവായ ടാറ്റാ സ്റ്റീലിനെ പിന്തള്ളിയാണ് ടാറ്റയുടെ തന്നെ ഐടി കണ്സള്ട്ടന്സി സര്വീസ് കമ്പനിയായ ടിസിഎസ് ഒന്നാമതെത്തിയത്. കോര്പറേറ്റ് പരിപാലനം, സാമ്പത്തിക ഭദ്രത, നേതൃപാടവം എന്നിവ അടിസ്ഥാനമാക്കി നടത്തിയ പഠനത്തില് ടിസിഎസ് മികച്ച പ്രകടനമാണ് കാഴ്ചവെച്ചത്.
എസ്ബിഐ, എല് ആന്ഡ് ടി, ടാറ്റാ സ്റ്റീല്, ഒഎന്ജിസി, മാരുതി സുസുകി, ഐസിഐസിഐ ബാങ്ക് എന്നിവയാണ് പട്ടികയില് ഇടം പിടിച്ച മറ്റു കമ്പനികള്.
ഗ്ലോബല് മാനേജ്മെന്റ് കണ്സള്ട്ടന്സിയായ ഹായ് ഗ്രൂപ്പാണ് ഫോര്ച്യൂണ് മാഗസിനു വേണ്ടി പഠനം നടത്തിയത്. നേതൃപാടവവും ഓഹരി മൂല്യവുമാണ് ഇത്തവണ പ്രധാനമായും മാനദണ്ഡമാക്കിയതെന്ന് ഹായ് ഗ്രൂപ് എംഡി ഗൗരവ് ലഹിരി വ്യക്തമാക്കി. 16 മേഖലകളില് നിന്നായി 493 കമ്പനികളെ പഠനവിധേയമാക്കിയതായും അദ്ദേഹം അവകാശപ്പെട്ടു.
Discussion about this post