പനാജി: സാമ്പത്തികസ്ഥിതി മെച്ചപ്പെടുത്താന്‍ വരുന്ന ഒന്നുരണ്ടു വര്‍ഷത്തേക്കു കടുത്ത സാമ്പത്തിക നടപടി സ്വീകരിക്കേണ്ടി വരുമെന്നു പ്രധാനമന്ത്രി നരേന്ദ്ര മോഡി. ഏതെങ്കിലും ചില വിഭാഗങ്ങളെ മാത്രം ബാധിക്കുന്ന തരത്തിലായിരിക്കില്ല നടപടികളെന്ന് പനാജിയില്‍ ബിജെപി യോഗത്തില്‍ അദ്ദേഹം പറഞ്ഞു.
മുന്‍ സര്‍ക്കാര്‍ ഖജനാവ് കാലിയാക്കിയാണു ഭരണം അവസാനിപ്പിച്ചത്. രാജ്യത്തിന്റെ സാമ്പത്തികസ്ഥിതി അതിന്റെ അടിത്തട്ടിലെത്തിയിരുന്നു. രോഗം ബാധിച്ച കുട്ടിക്ക് അമ്മ കയ്‌പേറിയ മരുന്നുനല്‍കുന്നതുപോലെ കര്‍ശനമായ നടപടികളിലൂടെ മാത്രമേ സമ്പദ്‌വ്യവസ്ഥയ്ക്കു മാറ്റമുണ്ടാക്കാന്‍ കഴിയൂ. ബിജെപിയെയോ മോഡിയെയോ പ്രകീര്‍ത്തിച്ചതുകൊണ്ടു രാജ്യത്തെ സഹായിക്കാനാവില്ല. മോഡിയെക്കുറിച്ചു വാഴ്ത്തുപാട്ടുകള്‍ പാടിയതുകൊണ്ട് സമൂഹ്യസ്ഥിതിയില്‍ മാറ്റം വരില്ല. അതിനു കടുത്ത നടപടികള്‍ അനിവാര്യമാണ്. അതിന്റെ പേരില്‍ സര്‍ക്കാരിനെ കുറ്റം പറയരുത്. പ്രതികൂല നടപടികള്‍ തന്നോടുള്ള ജനങ്ങളുടെ സ്‌നേഹം കുറയാന്‍ കാരണമായേക്കുമെന്നും മോഡി പറഞ്ഞു. രാജ്യതാത്പര്യം മുന്‍നിര്‍ത്തി കര്‍ശന സാമ്പത്തിക നടപടി സ്വീകരിക്കുമെന്നു പൊതുയോഗത്തിനു പിന്നാലെ മോഡി ട്വിറ്ററിലൂടെയും അറിയിച്ചു. ദേശീയ താത്പര്യം പരിഗണിച്ചായിരിക്കും തീരുമാനങ്ങളെന്നും അദ്ദേഹം വിശദീകരിച്ചു.
Discussion about this post