ഡോ. വി.ആര്‍.പ്രബോധചന്ദ്രന്‍ നായര്‍
മൂലാധാരൈകനിലയാ ബ്രഹ്മഗ്രന്ഥി വിഭേദിനി
മണിപൂരാന്തരുദിതാ വിഷ്ണുഗ്രന്ഥി വിഭേദിനീ
കുണ്ഡലിനീശക്തിസ്വരൂപിണിയായ ദേവിയുടെ മുഖ്യപാര്‍പ്പിടം മൂലാധാരമാണ്. (മൂല – ആധാര – ഏക) ദേവി സ്വാധിഷ്ഠാനചക്രത്തിനുമുകളിലത്തെ അഗ്നിമണ്ഡലത്തിലുള്ള സൃഷ്ടിവാസനാ പ്രതീകമായ ബ്രഹ്മഗ്രന്ഥിയെ പിളര്‍ക്കുന്നവളത്രേ (അതായത് സൃഷ്ടിവാസനയ്ക്കതീത).
മൂലാധാരം = സുഷ്മ്‌നാനാഡിയുടെയും മറ്റെല്ലാ ചക്രങ്ങളുടെയും അടിയിലുള്ളത്, കുണ്ഡലിനീ ശക്തിയുടെ ആധാരം.
(മണിപൂര – അന്തര്‍ – ഉദിതാ) ബ്രഹ്മഗ്രന്ഥിയെ പിളര്‍ന്നുയരുന്ന കുണ്ഡലിനീശക്തി നാഭിപ്രദേശത്തെ മണിപൂര(ക)ചകത്തിലെ പത്തിതള്‍ത്താമരയുടെ നടുവില്‍ ഉദിക്കുകയും അനാഹതചക്രം കടന്ന് സൂര്യമണ്ഡലത്തിലെത്തി അവിടെയുള്ള സ്ഥിതിപ്രതീകമായ വിഷ്ണുഗ്രന്ഥിയെ പിളര്‍ക്കുകയും ചെയ്യുന്നു.
ആജ്ഞാചക്രാന്തരാളസ്ഥാ രുദ്രഗ്രന്ഥി വിഭേദിനീ
സഹസ്രാരാംബുജാരൂഢാ സുധാസാരാഭിവര്‍ഷിണി
(ചക്ര – അന്തരാള) വിഷ്ണുഗ്രന്ഥിയെ ഭേദിച്ച കുണ്ഡലിനി വിശുദ്ധിചക്രവും കടന്നുയര്‍ന്ന് ആജ്ഞാചക്രമധ്യത്തിലെത്തുകയും അവിടെ രുദ്രപിണിയായി വര്‍ത്തിച്ച് അവിടത്തെ ചന്ദ്രമണ്ഡലത്തിലെ രുദ്രഗ്രന്ഥിയെയും പിളര്‍ക്കുകയും ചെയ്യുന്നു.
(സഹസ്ര – ആര – അംബുജ – ആരൂഢാ) (സുധാ – ആസാര – അഭി) സഹസ്രാരം (ആയിരം ഇതളുള്ളത്) എന്ന താമരപ്പൂവില്‍ക്കയറിയിരിക്കുന്ന ദേവി. അമൃതിന്റെ ധാരയെ (ആസാരം) ധാരാളം (അഭി-) പൊഴിക്കുന്നു.
Discussion about this post