ന്യൂഡല്ഹി: ഉന്നതനീതിപീഠങ്ങളിലെ ജഡ്ജിമാരെ നിയമിക്കുന്നതിനുള്ള ജുഡീഷ്യല് കമ്മീഷന് ബില് ലോക്സഭയില് പാസാക്കി. ജഡ്ജിമാരെ നിയമിക്കാന് ആറംഗകമ്മീഷനെ നിയമിക്കുന്നതാണ് ബില്. ശബ്ദവോട്ടോടെയാണ് ബില് പാസാക്കിയത്. നിലവിലുള്ള കൊളീജിയം സംവിധാനത്തിനു പകരമാണ് പുതിയ കമ്മീഷന്. കോണ്ഗ്രസും എഐഎഡിഎംകെയും ബില്ലിനെ പിന്തുണച്ചു.
ചീഫ് ജസ്റ്റീസ്, രണ്ടു സുപ്രീം കോടതി ജഡ്ജിമാര്, നിയമമന്ത്രി, മറ്റു രണ്ടു പ്രമുഖവ്യക്തികള് എന്നിവരടങ്ങുന്നതാണ് ആറംഗസമിതി. സുപ്രീം കോടതിയിലെ ജഡ്ജിമാരെ നിയമിക്കുന്നതുമായി ബന്ധപ്പെട്ട് ഭരണഘടനയുടെ 124-ാം അനുഛേദത്തിലാണ് സര്ക്കാര് മാറ്റം വരുത്തുന്നത്.
നീതിന്യായവ്യവസ്ഥയുടെ അധികാരത്തില് ഇടപെടാന് സര്ക്കാര് ശ്രമിച്ചിട്ടില്ലെന്നും ഉന്നതനീതിപാഠങ്ങളില് ജഡ്ജിമാരെ നിയമിക്കുന്നതില് ഒരു നല്ല നടപടിക്രമം കൊണ്ടുവരികയാണ് ബില്ലിലൂടെയെന്നും നിയമമന്ത്രി രവിശങ്കര് പ്രസാദ് അറിയിച്ചു.
ജഡ്ജിമാരുടെ നിയമനത്തിന് കൊളീജിയം സംവിധാനം ഫലപ്രദമല്ലെന്നും നിയമഭേദഗതിക്കായി കഴിഞ്ഞ 20 വര്ഷത്തിനിടെ 20 തവണ ശ്രമിച്ചിരുന്നുവെന്നും അദ്ദേഹം ബില്ലിന്മേലുള്ള ചര്ച്ചയില് അറിയിച്ചു. വ്യാഴാഴ്ച ബില് രാജ്യസഭയിലും അവതരിപ്പിക്കും.
Discussion about this post